Uran suli naaggaarneqarpoq
Aatsitassanut naalakkersuisoq Ove Karl Berthelsen Canadami paasisassarsiorluni angalasoqareernerata kingorna eqqissisaavoq.
Ove Karl Berthelsenip (IA) qanittukkut Kommune Kujallermi borgmesteri Simon Simonsen peqatigalugu Canadami paasisassarsiorluni angalasup borgmesteri isumaqatigiinngilaa oqarmat, uranimik piiaaneq navianaateqanngitsoq, nunarsuarmik killigititaasut iluanni ingerlatsigaanni.
- Canadami pisortanit nakkutilliisitsinerinnarmi inuit 850 missaat sulisorineqarput, allaffissornikkullu uranimik tunisassiornermik misilittagaqarnatalu ilisimasaqanngilagut, Ove Karl Berthelsen KNR Radioaviisimut oqarpoq.
Simon Simonsenip uranisiortoqanngivinnissaata ajorunnaarsinnissaanik kissaataa akuerinianngilaa.
- Taama isumaqarniaruni isumaqarniarli. Naalakkersuisunili isumaqarpugut aatsaat annertuumik suliaqareerutta paasisitsiniaalutalu akimmisaatutit peernissaannut isummersinnaavugut, Kalaallillu Nunaat uranimik tunisassiortunngortillugu. Tamannan kissaatiginngilluinnarparput, Ove Karl Berthelsen oqarpoq.
Parteeqataa Kummunimilu Kujallermi kommunalbestyrelsemut ilaasortaq Lasse Davidsen aamma angalaqataavoq, Canadameereernermili kingorna uranimut tunngatillugu allamik isumminngilaq.
- Akerlianillu uppernarsivara aatsitassanik uranitalinnik piiaanissamut akerliunera tunngavissaqarluartoq. Tamannalu nukittorsarneqaannarpoq, Lasse Davidsen KNR-imut oqarpoq.