Imminut toquttarnerup akiorniarnera
Ullumi nunarsuarmi tamarmi aaqqissuisoqarpoq takutinniarlugu suli imminut toquttarneq annertuumik ajornartorsiutaasoq, pinaveersaartinnissaanullu iliuuseqartoqartariaqartoq.
Ullumikkut septembarip 10-ani imminut toquttarnerup pinaveersaartinnisaanut FN-ip ullorititaa. Tassaavoq ukiut tamaasa ingerlanneqartartoq, nunarsuarmilu tamarmi septembarip 10-ani malunnartinniarneqartartoq, nanoq.gl allappoq.
Nunarsuaq tamaat aaqqissuussisoqartarpoq erseqqissaatiginiarlugu, imminut toquttarneq suli annertuumik ajornartorsiutaasoq, aamma pisariaqartoq imminut toquttarnerup pinaveersaartinneqarnissaanut iliuuseqartoqartarnissaa.
Aamma uagut Kalaallit Nunaanni ukiut tamaasa imminut toquttarnerup pinaveersaartinneqarnissaanut nunarsuaq tamaat ulloqartitsisarneq malunnartittarparput. Ukioq manna PAARISA-p toqqarsimavaa imminut toqunnermi qimataasut samminiarlugit. Taakkuuppummi akuttunngitsumik isigineqanngitsoortartut nipaarluusullu, annertumik aliasunnermik kiserliornermillu artorsaateqartartut. Taamaattumik 2009-imiilli PAARISA immikkut ittunik pikkorissartitsisarsimavoq qimataasut immikkut inissisimanerat aamma immikkut ittunik pisariaqartitsinerat pillugu, PAARISA-mi imminut toquttarnerup pinaveersaartinneqarnissaanut pikkorissartitsisarnernut tapertatut.
PAARISA illoqarfinnut nunaqarfinnullu aningaasatigut tapiisarpoq, najukkani aaqqissuussinissanut suliniuteqartunut imminnut toquttarnerup pinaveersaartinneqarnissaani nunarsuaq tamaat ulloritinneqartartumik malunnartitsiniarnermut. Ukioq maanna ulloq malunnartinneqassaaq Aasianni, Kangaatsiami, Nuummi, Paamiuni aamma Qaqortumi nunarfinnilu, Illorsuit, Attu, Iginniarfik, Ikerasaarsuk, Niaqornaarsuk, Atammik, Qeqertarsuatsiaat Arsummilu.
Nuummi ulloq malunnartinneqassaaq pisortatigoortumik aaqqissuussisoqarluni katersor-tarfimmi nalunaaqutaq ataatsimiit tallimanut, tassani ilaatigut Nuummi politiiniit, Dronning Ingridip Napparsimmavissuani eqqarsartaatsikkut immikkoortortaqarfimmiit, Avatangiisilerisuniit aamma Kommuneqarfik Sermersuumi Innarluutilli Sullissivianniit saqqummiussisoqartussaalluni. Aamma imminut toqussimasunit qimataasut marluk taalliaminnik atuaassapput.
Kangaatsiami imminut toqussimasut qimataat saqqummiussaqassapput tamatumalu kingorna pineqartoq pillugu oqallisiginnittoqarluni saqqummiisoqassaaq ataatsimoortumillu erinarsoqatigiittoqassalluni.
Aasianni ulloq malunnartineqassaaq GU-mi ilinniartunit filmiliarineqarsimasumik takutitsinikkut. Filmi qulequtaqarpoq ”Qiviukkut” imminullu toquttarnermik samminnittuulluni. Taamaasiortoqareerpat oqallittoqassaaq nipilersortoqassallunilu. Aaqqissuussineq naggaserneqassaaq iliveqarfimmut ataatsimut ikumatitalisaarluni ingerlaaqatigiinnermik.
Qammaavimmit sulisut piareersimassapput, peqataasunit oqaloqatiginninnissamut pisariaqartitsisoqalissagaluarpat.
Imminut toquttarnerup pinaveersaartinneqarneranut nunarsuaq tamaat ullorititaq ingerlanneqassaaq the International Association for Suicide Prevention (IASP) suliniuteqartoralugu WHO suleqatigalugu. Ukioq manna sammineqartut ukuupput Many Faces, Many Places: Suicide Pre-vention Across the World (Kiinarpassuit, Sumiiffippassuit, Nunarsuaq tamaat Imminut toquttarnerup Pinaveersaartinneqarnera).