Cirkus Arena tikilerpoq
Tallimanngornermiit pingasunngornermut illoqarfiit tallimat Cirkus Arena-mit tikeraarneqassapput.
Ukiarpoq taamaasillunilu pisarnertut Cirkus Arena nunatsinnukarpoq. Cirkusilerisullu qilanaarput.
- Uagutsinnut cirkusilerisunut Kalaallit Nunaata tikeraarnera immikkut illuinnartuuvoq, cirkusippisortaa Benny Berdino oqarpoq.
Ukioq manna cirkusi isiginnaagassiorsimavoq artistit assigiinngitsorpassuit atorlugit. Klovnit assigiinngitsut marluupput, tassalu Martino & Co., siusinnerusukkut nunatsinneereersimasut, aamma Don Christian, Cirkus Arena malillugu quianartorujussuaq.
Aamma manegemi takutitsisoqartassaaq majuartarfinnik uppinnaveersaarnermik, arsanik nakkaanaveersaarnermik, assanik nikorfanermik aammalu torrallataasumik allunaasanik silaannakkullu takutitsinernik allarpassuarnillu, soorunamilu Pjerrot ilaassaaq, Christian Warrer, Cirkus Arenameersoq, oqaluttuarpoq.
Cirkus Arena makkunani misigineqarsinnaavoq:
Maniitsoq, sisamanngorneq 30. september nal. 19.
Sisimiut, tallimanngorneq 1. oktober nal. 19
Nuummi Inussivik, sapaat 3. oktober nal. 15 aamma 18
Aasiaat, ataasinngorneq 4. oktober nal. 19
Ilulissat, pingasunngorneq 6. oktober nal. 19
Isiginnaartitsinerit timersortarfinni ingerlanneqartassapput.