Meeqqat atugarliortut ikiorniarlugit
Københavnimi kulturip illorsuisa annersaat marluk sapaatip akunnerata naanerani "Kalaallit Nunaata ulluiniik" ingerlatsissapput.
Kalaallit meerartaat atugarliortut ikiorniarlugit ASF - Dansk Folkehjælp sapaatip akunnerata naanerani Kalaallit Nunaata ulluinik aaqqissuussissaaq - filminik, assilisanik eqqumiitsulianillu, assigiinngitsutigut Kalaallit Nunaannik takutitsisunik, takutitsilluni.
Magstrædemi illumi tallimanngormat arfininngorpallu filiminik piviusulersaarutinik aliikkutassianillu takutitsisoqassaaq, tamatumani ilanngullugu isiginnaartitsisartup erinarsortartullu Lotte Andersenip filmiliaa piviusulersaarut ´Teenagerdrømme i Grønland´ - kalaallit meerartaat inuusuttortaallu, 2009-mi Ilulissani isiginnaagassiortitseqatigisimasani pillugit filmiliaa. Filmip takutinneqarnerata saniatigut kalaallit kulturiannik naapitsinini filmillu sananeqarnera pillugit oqaluttuassaaq.
Arfininngornikkut aamma nunatsinni angalatoorsuup Knud Rasmussenip filmiliaa tusaamasaq ´ Palop Nuliarsarnera´ 1933-imeersoq takutinneqassaaq. Filmi aliikkutassiaagaluarpoq - kalaallinik piniartunik aallaaniartartunillu inuttalik - taamanikkulli Kalaallit Nunaata qanoq ittuuneranik aamma takutitsilluni. Filminik tusagassiorfinnillu ilisimatusarnermi lektorip Karsten Fledelius-ip, filmimik ilisimannittorujussuup filmi ilisaritissavaa.
Tamatuma saniatigut Islands Bryggemi Kulturip Illorsuani arfininngornermi assinik saqqummersitsineq ammarneqassaaq, ilaatigut issittumi assiliisartup Ivars Silisip assilisaanik, taanna Avannaani ukiuni pingasuni geofysikeritut atorfimminit soraariarluni qimussimik nannunniat aallaaserluni assiliivilerlunilu angalaqatigisimallugit. Aamma tassani eqqumiitsuliortup Oline Binzerip eqqumiitsuliai takuneqarsinnaapput.
Sapaammi Islands Bryggemi Kulturip Illorsuani ilaqutariinnut meerartalinnut assigiinngitsunik aaqqissuussisoqassaaq - ilaatigut kalaallit oqaluttuaannik.