Kalaallit anisuumik tuniserusuttut ujaarineqarput
Qallunaat aappalaartunik nujalinnik meerartaarumanngillat - taartumik amilinnik meerartaarusunnerupput. Anisuunik sillimmateqarfik kalaallinik anisuuersittartunik perusuppoq.
Newspaq allappoq angutit aappalaartunik nujallit anisuuinik arnat perusunngitsut. Taamatut paasissutissiivoq anisuunik sillimmateqarfik Cryos.
Tassami qallunaat nalinginnaasut anisuui tunisaavallaanngillat:
- Nalinginnaasumik europap avannaamiuisa anisuui imatorsuaq piumaneqanngillat. Assigiinngisitsinianngilagut, angutilli aappalaartunik nujallit anisuuinik naammattunik sillimmateqareerpugut. Nunani avannarliunerusoq tamakkua piumaneqarput, Ole Schou, Cryos-ip pisortaa, Newspaq-imut oqarpoq.
Akerlianik assersuutigalugu Kinamiuugaanni, Afrikamiuugaanni imaluunniit Irakermiuugaanni Cryosimut anisuuerluni aningaasannattoqarsinnaavoq. Tassami arnat inuusuttut anaananngorusuttut angutit afrikamiut, asiamiut aammalu kangiani qiterlermiut anisuuinik piumanerupput.
- Anisuuminnik tunisiumasunik amerlanerusunik pissarsiuminaappoq, ilaatigulli Århusip eqqaani Gellerupimi, allamiorpassuit najugaqarfianni allagartaliiniartarsimavugut. Tunisisartuttali 10 procentiisa missaannaat kaukasus-imiuunngillat, Ole Schou Newspaq-imut nassuiaavoq.
- Aamma kalaallit angutit anisuuinik pisariaqartitsivugut, tassa kalaallimik ataasinnguamilluunniit tunisisartoqannginnatta, taanna oqarpoq.