Sakkutuut umiarsuaat Nuummiittut
Assitalersugaq. Canadamiut, amerikamiut qallunaallu sakkutuuisa umiarsuaat Davis Strædemi sungiusarnerminnut atatillugu Nuummut taqussersoriartorput.
USS Morter, HMCS Montreal aamma HDMS Vædderen ulluni makkunani taqussersoriartorlutik Nuummiipput innuttaasunilluu pulaartitsillutik.
Umiarsuit taakku canadamiut siulersugaannik sungiusarnermut, ukiuni sisamani ingerlasimasumut Nanook-imut peqataapput.
Canadami sungiusarnerit annersaanni sakkutooqatigiit assigiinngitsut peqataapput - imaappoq sakkutuut imarsiortut saniatigut aamma sakkutuut nunasiortut timmisartortartullu peqataapput. Canadamilu inuinnartigoortumik ingerlatanik aamma peqataasoqarluni.
Imaappoq sungiusarnermut atatillugu Canadami aamma sakkutooqarnikkut assigiinngitsunik ingerlatsisoqarpoq. Ilaatigut Canadap sineriaanik nakkutilliisunik US Coast Guard-imillu.
Sungiusarneq sapaatip akunnerata siornatigut Davis Strædep kujasissortaani aallartinneqarpoq umiarsuillu Grønlands Kommando Kangilinnguaniittoq tikeraarsimavaat.
Sungiusarnermi pisortaasoq canadamiu kommandør Art MacDonald oqaluttuarpoq, umiarsuit pingasuullutik imarsiortunik 600-nik inuttaqartut. Sungiusarnerli tamakkerlugu inuit 800-it missaanniittut peqataapput.
Art MacDonaldip isertunngilaa, sungiusarneq canadamiut tungaanniit canadamiut Issittuni oqartussaassusiannik isersitsiniarnertut isigineqarmat.
Sapaatip akunnerani qaangiuttumi umiarsuit pisinnaasut assigiinngitsut tunngavigalugit sungiusaqatigiissimapput.
Ilaatigut sorsunnermi imminut illersorsinnaaneq, ilaatigut aqqartartunut sorsunneq assigisaallu, ilaatigullu mingutsitsinermik akiuiniarneq, ilaatigullu SAR-ip ingerlatassai, Art MacDonald ilisimatitsivoq.
Sungiusarnerit sapaatip akunnerani aggersumi Baffin Bugtip Lancaster Sund-illu avannarpasissortaanni ingerlateqqinneqassapput.
Tassanilu canadamiut umiarsuaasa saniatigut aamma umiarsuaq nakkutilliissut Knud Ramussen, aamma sungiusaqataasussat naapissavaat. Knud Rasmussen Kalaallit Nunaata Kitaanik nakkutilliilluni augustimi Qaanaap eqqaaniissaaq Robeson Kanalen 82,2 N-miittoq tikillugu ingerlassalluni.
Art MacDonaldip sungiusartarneq avannarpartikkaluttuinnarneqarnerarpaa, aatsaallu taama avannarpasitsigisumut killinnerarlutik.
– Immap sikuertarfiata killinga vannarparaluttuinnarami, orlogskaptajn Michael Bager, Grønlands Kommandomi attaveqaataasoq oqarpoq.
Art MacDonaldip nunat sanileriit pingasut suleqatigiinnissaat pingaartippaa.
– Suleqatigiikkutta nukittunerullutalu suliassat pitsaanerusumik naammassisarsinnaavagut. Arlaannik pisoqassappat suleqatigiinnissaq pingaartuuvoq. Suleqatigiinnikkut pinasuarnerusumik sulisarsinnaagutta pisussat suulluunniit suliarilluarsinnaanerusassavagut.
Issittuni Qalasersuarmut Avannarlermut taama qanitsigisumi sungiusarnersi russit qanoq igaat?
– Sungiusarnerput russit nalunngilaat. Qalasersuup Avannarliup eqqaani eqqissisimanartutut, suliassat pillugit sulqatigiiffigisinnaasatsitut isigaarput. Ruslandi sanilitut pingaarutilittut, pisariaqalerpallu suleqatigisinnaasatsitut isigaarput, naatsorsuutigaarpullu russittaaq Issittuni sungiusarnermut peqataalerumaartut.
Russimmi aamma Arktisk Rådimi, Danmarkip-Kalaallit Nunaata massakkut siulittaasuuffigisaanni ilaasortaapput. Tassanilu aamma suleqatigiissitaqarpoq amerikamiut russillu siulittaasuuffigisaannik, issittuni upalungaarsimanerup qanoq issusianik misissuisussamik. Arktisk Rådimi siulittaasuuneq aappaagu Sverigep tigusussaavaa tamannalu Nuummi pissaaq, tassalu suleqatigiissitap Issittuni upalungaarsimaneq pillugu nalunaarusiaminik tunniussaqartussaavoq, suleqatigiinnerlu taanna russit aamma peqataaffigilluinnarpaat.
Vædderip naalagaata kommandørkaptajn Anders Blochip Qeqertarsuup Tunuanut killeriarunik Cairnip qillerivianut pulaarnissartik naatsorsuutigaa.
– Sulineralli akorngusersussanngilarput isumannaallisaanermut tunngasut kisiisa soqutigissavagut, oqarpoq.
Sakkutuut umiarsuaasa Nuummiinneranni assilisat her /uani takusinnaavatit.