"Greenshit angerlarit!"

Suaartaattoqartorujussuuvoq inuillu 100-t sinnillit takkupput Greenpeace akerliussutsimik takutitsivigineqarmat.

Inuit 150-t missaanniittut Greenpeacemut akerliussutsimik takutittsipput. Ass.: Mads Nyvold

- Greenpeace pissutigalugu meeqqat kaapput

- Inupalaat, nunarsuarmut allamut imminut igeriutigitsi

- Naatitanik naatitsineq ajorpugut puulukiunatalu

- Greenshit puulukiitisi paariniarsigit

- Greenpeace salluvoq

- Suliniaqatigiiffit allat tusaaniarpavut, Greenpeace-unngitsoq

Qallunaatut, tuluttut kalaallisullu allagartani allagartarsuarnilu nalujaanaatit taamatut nipaqarput inuit 150-t missaanniittut nassataanni, sisamanngormat unnukkut Nuummi Katuap saavani Greenpeacemut akerliussutsimik takutitsinermi.

Kulturip illorsuani isersimapput avatangiisinik illersuiniaqatigiiffiup generalsekretæria, biologi, nittarsaanermik aaqqissuussisoq silallu pissusianik sulialik. Taakkua tusarnaarianut 45-t missaanniittunut nassuiarpaat sooq Cairn-ip misiliilluni qillerinerinut akerliunerlutik.

Ataatsimiinerup aallartinnginnerani akerliussutsimik takutitsisut Katuamit 10 meterinik ungasissusilimmiipput. Innuttaasunik ataatsimiititsinissap qanilliartornerani ammalortunngorlutik Katuamut qanilliartorput. Naggataatigut kulturip illorsuata isaariaa unguvaat.

Inuit Katuamut isertut akerliussutsimik takutitsisunit suaartarfigineqartorujussuupput. Ajorinninnermi aamma pineqarput nuummiut nalaatsornerinnarmik takkuttut, tamakkualu tuaviinneq filmertarfimmut billetsitik takutittarpaat, takutinniarlugu popkornit colallu puisit amiinit uuliamillu soqutiginerullugit.

Akerliussutsimik takutitsineq tunngaveqarpoq Pilu Kasper Bechip, Nuussuarmeersup, periataarluni qisuariaataanik. Qeqertarsuup eqqaani qillerinernut tunngavinnik Greenpeacep sallulioqattaarneranik taasani qatsutivillugit pingasunngormat Facebookimi gruppi "Kalaallit Greenpeacemut akerliusut" pilersippaa.

Ullaarnganiit gruppi ingerlaannaq alliartorpoq akerliussutsimillu takutitsinermi 180-init nuannarinnitseqalersimalluni. Pilu Kasper Bechip Facebookimi gruppimik pilersitsinermini eqqarsaataasa pingaarnerit ilagisimavaat Greenpeacep innuttaasunik ataatsimiititsiniarnerata mattunnissaa.

- Greenpeacep allat tunngavilersuutaat tusaaniarneq ajorpai. Taamaattumik innuttaasunik ataatsimiititsinermi oqallinnermut akulerunnissaq iluaqutaanavianngilaq. Katuami innuttaasunik ataatsimiititsineq ussagarneqarluarpat suliniutaat akuersaarneqassaaq. Allaanavianngilaq Kalaallit Nunaanni inuit tusaaniaraat, taamaanngilluinnarporli, Pilu Kaster Bech oqarpoq, allagartarsuarmik tigumiarluni, tassani Greenpeace-mi naqinnerit kingulliit titarneqarsimasut Greenshit-imik naqinneqalersillugu.

Powered by Labrador CMS