Agathe Fontain-ip nunarput paasiniaaffigaa
Peqqinnissaqarfiup nutarteriffiginera innuttaasut tamarmik ilisimassavaat,taamaattumik Peqqinnissamut naalakkersuisup nunatsinni sumiiffiit tamaasa tikeraassavai.
Nunaqarfiit minnersaannit illoqarfiit annersaannut. Najugaqarfit tamarmik Agathe Fontain-imit tikeraarneqarnissartik qilanaarissavaat.
- Peqqinnissaqarfiup nutarterneqarnissaanik suliaqarneq sapinngisamik ammasumik ingerlanneqassasoq kissaatigaara. Taamaattumik Kalaallit Nunaanni sumiiffiit tamaasa tikeraarfigissavakka, Peqqinnissaqarfiup nutarteriffigineqarnera innuttaasunut oqaluttuariumallugu, peqqinnissaqarfimmilu sulisunik ataatsimeeqateqartassallunga, Peqqnissamut Naalakkersuisoq Agathe Fontain allappoq, tusagassiutinut nalunaarummi.
Ullumikkut ataasinngornermi Qaasuitsup Kommuneani politikerit atorfillillu ataatsimeeqatigissavai. Ullormut oqaluuserisassat ilagaat Qaanaami Ataatsimiititap meeqqanut inuusuttuaqqanullu suliniuteqarnermi qanoq iliuuseqarnissamut pilersaarutip ingerlateqqinnreqarnissaata oqallisigineqarnissaa, aamma imerunnaarnissamut katsorsartinnerup malitsdeqartinneqarnissaa. Suliap tamatuma tiguneqarnissaa ingerlateqqinnissaalu Qaanaami pitsaaliuinermut ataatsimiititap Qaasuitsup Kommunea suleqatigalugu isumagissagaa isumaqatigiissutaavoq.
Namminersorlutik Oqartussat sinnerlugit qallunaat siulittaasoqarfiat peqatigalugu Nordisk Nakortikaforum-ip Ilulissani ataatsimiinnerani aqaguani Agathe Fontain tikilluaqqusissaaq. Ikiaroornerartut pillugit Naalakkersuisut politikiat ataatsimiinnermi Agathe Fontainip saqqummiutissavaa, nunalu tamakkerlugu pitsaaliuinermik suliaqarneq PAARISA-p paasissutissiissutigissallugu.
- Inuunermi atugarisat peqqinnartut siuarsarnissaannik peqqinnartumillu inooriaaseqarnissamik kissaateqarneq ikiaroornartunut Naalakkersuisut politikeqarneranni aalajangersarneqarpoq. Ikiaroornartunut politikeqarnermi pingasut tunngaviupput: inatsisiliorneq, katsorsaaneq aamma pitsaaliuineq. Nunat avannarliit suleqatigineqarnerat Naalakkersuisut annertuumik pingaartippaat, misilittakkanillu paarlaateqatigiinnissaq qilanaaralugu, Nordisk Narkotikaforum-ip ataatsimiinnerani pisussaq, Peqqinnissamut Naalakkersuisoq Agathe Fontain oqarpoq.