Gasimik nassaarneq Dong-imi immikkut ilisimasallip ajunnginnerarpaa
Qiimmaallannarpoq, annertunerunngilarli, Qeqertarsuup avataani gasimik nassaarneq taamatut naliliiffigineqarpoq
- Gaseqarneranik takussutissamik nassaartoqarpoq, kulbrintinillu pilersoqartartoq uppernarsarneqarpoq, Arne Rosenkrands oqarpoq, Dong Energy-mi immikkut siunnersuisartoq, uuliasioqatigiiffiillu Kalaallit Nunaata eqqaani qillerisut kattuffianni siulittaasoq.
Cairn allaffimmut uterluni immap naqqanik nalunaarsuinerminik suliaqaqqilissasoq isumaqarpoq. Maannakkut ilisimasanik pingaarutilinnik peqarluni.
Annertuumik siuariartoqarsimasoq Arne Rosenkrands aamma isumaqanngilaq. Siullermillu qillerinermi tamanna naatsorsuutigineqarsinnaanngilaq.
- Siullermeernermi annertoorujussuarmik nassartoqarnissaa tamatigut neriuutigineqartarpoq, tamannali nalinginnaanngilaq. Qillerinerulli aallartinneqarnerani nalinginnaasumik isumatusaartoqarnerulersarpoq, Arne Rosenkrands oqarpoq.
Basalti sulinermik kigaallassaarisoq aappassaanik qillerinermi Cairn-ip ajornartorsiutigisimavaa. Kalaallit Nunaata eqqaani Dong misissuinermik ingerlatsivoq, immallu naqqani qaqqat sananeqaataasa manngertut »akimut takuneqarsinnaanerat, tamaani uuliaqarfeqarnersoq takujumallugu.
Skålitut killormut sammisutut uulia toqqorsimmaveqartarpoq, nunap iluani toqqorneqarsimasaluni. Qillerinerup akisuallaarnera pissutigalugu qillerinermi eqqortumik eqquinissaq pingaaruteqarpoq.
Ujarlerfimmi misissuineq paasiumallugu Dong 2008-mili suliaqarsimavoq, qillerisoqarsinnaaneratali aalajangiunnissaanut suli piarteertoqarsimanngilaq.
Nutaarsiassaqartitsivik Reuters malillugu, Kalaallit Nunaata eqqaani pissutsit kingunerannik Cairn uuliaqarfinnik nappartanik 250 millioninik amerlassusilinnik nassaartariaqarpoq, uuliamik qalluilernissap imminnut akilersinnaalernissaanui. Gasimik nassaartoqassappat annertunerujussuarmik nassaarnissaq pisariaqartinneqarpoq, naturgasimut imerpalasumut suliaqarfissamik sanaartornissaq akisoorujussuummat.