Premier Leaguemi klubbimik piginnittup yachtia imartatsinni
Yachtskiberujussuit marluk Davis Strædetimiipput. PIginnittaat tassaapput Premier League-mi pc-nillu ingerlatsivinni pisuunerpaat marluk.
Nunarsuarmi yachtskibet annersaasa 9-assaat 16-issaallu marlunngormat ataatsikkut Nuup umiarsualivianiipput. Royal Arctic Logistic aamma Blue Water, umiarsuarnut taakkununnga agentiusut oqaaseqarumavallaanngillat.
Aaqqissuussiviulli misissuineratigut paasineqarpoq Pelorus milliardærimit Roman Abramovich-imit pigineqartoq, taannalu ilisimaneqarneruvoq tuluit nunaanni arsaattartut klubbiannik Chelsea-mik piginnittutut.
Yachtskibi Pelorus 115 meterinik takissuseqarpoq Octopus-illu sananeqarfiani, Tysklandimi illoqarfimmi Bremen-imi umiatsialiorfimmi Lüssen-imi, sanaajuvoq.
Octopus umiarsuangaatsiarsuuvoq, 126 meterinik takissusilik Pelorus-itullu marlunnik helikoptereqarpoq. Taanna Paul Allenimit pigineqarpoq, Bill Gates peqatigalugu aqutseriaatsimik Windowsimik nassaartoq.
Umiarsuit marluullutik qaartartunut akiuussutissaqarput, 20 knobinillu sukkassuseqarsinnaallutik.
Pelorus maanna Kangerlussualiarpoq piginnittuni Roman Abramovich aallugu. Tassanngaanniit avannamukassaaq iluarujussuaq 260 kvadratkilometerinik angissusilik, Avannaani Petermann Gletsjer-imit kaanngarsimasoq, ujariartorlugu.