Sakkutuut nunatsinni suliassaat amerlanerusut
Kuupik Kleistip piumasaraa sakkutuut nunatsinniittut amerlineqassasut.
- Sakkutooqarnermut aningaasartuutit amerlineqassapput, folketingimi isumannaatsuunermut politikki pillugu tusarniaanermi naalakkersuisut siulittaasuat Kuupik Kleist oqarpoq. Qungujoruloorlunilu nangipallappoq:
- Taamatut oqartunga imminut tusaassallunga ilimagisimanngikkaluarpara.
Kalaallit Nunaannili sakkutuut inuinnaallu suliassaat nutaat arlallit takkussuutilereersimapput. Umiarsuit amerlanerusut, takornariartaatit assartuutillu, kiisalu uuliasiorluni qillerinerit, pissutigalugit annertunerusumik suliniuteqarnissaq nakkutilliinissarlu pisariaqalersimapput. Naalakkersuisullu siulittaasuata nassuerutigaa Kalaallit Nunaat suliassap nammineq suliarinissaanut periarfissaqanngilluinnartoq.
- Politikkikkut ineriartorneq qanorluunniit issagaluarpat siulittuutigaarput Danmarkimik politikkikkut suleqatigiinnissarput. Danmarkilli allaat nammineq issittumi suliassat nutaat tamaasa naammassisinnaanavianngilai, naalakkersuisut siulittaasuat oqarpoq.
Atlantikup avannaani issittumilu isumannaatsuuneq upalungaarsimanerlu pillugit folketingimi tusarniaanermi oqaaseqartut tamarmik isumaqatigaat unammilligassat ukiuni aggersuni annertusereriarujussuassasut. Ilaatigut tunup avannaani.
- Tunup avannaani umiarsuarnik angalaneq annertuseriarujussuarsimavoq. Tamanna uagutsinnut annertuumik unammilligassaavoq, Kangilinnguani Sakkutooqarfiup pisortaa, kontreadmiral Henrik Kudsk oqarpoq.
Qaammatip tulliuttup aallartinnerani naalakkersuisut siulittaasuata nunanut allanut ministeri Lene Espersen ataatsimeeqatigissavaa. Naalakkersuisut siulittaasuata neriuutigaa ataatsimiinneq "issittumi ataqatigiissumik politikkeqalernissamut" aallarniutaassasoq.