Nunatta aningaaseriviisa uuliasiorneq maluginngilaat
Uuliasiorneq iluatsissappat iluatsissanngippalluunniit nunatsinni aningaaserivinnut aningaaserivinnut pingaaruteqangaanngilaq.
Royal Bank of Scotland silap pissusiata allanngutsaaliornissaanik illersuisut marlunngormat aningaaserivik Royal Bank of Scotland pallitsaaliorlugu unguvaat, tamakkua naammaginngilluinnaramikku aningaasat ileqqaakkatik Qeqertarsuup eqqaani uuliasiornermut atorneqarmata.
Alaaserisaq: Cairn-imut akerliuniat parnaarunneqartut
Taamaasinerani aningaasallisartut anersaaruluummerput, Cairnip gas-imik nassaarneranik nalunaaruteqarneratigut selskabip aktiaasa nalingat 4 procentimik appariarmat.
Pisut tamakkua Grønlandsbankip Banknordik-illu, ukiup aallartinnerani Sparbankip nunatsinni immikkoortoqarfiinik tigusisup, ernumassutigisariaqanngilaat.
Tassami Nunatsinni uuliasiornermi aningaaseriviit aningaasaliissuteqarnikkut akulerussimanngillat.
- Uuliasioqatigiiffiit Issittumi uuliasiortut aningaaseriviup aningaasaliissuteqartarfiinut ilaanngillat, avammut attaveqartitsisartoq Stina Dudda sermitsiaq.ag-mut oqarpoq.
Banknordik-imi immikkoortoqarfimmi pisortaq Anne-Grethe Laursen oqaluttuarpoq aningaaserivik uuliasiornernut Cairnitut ittunut akulerussimanngitsoq itisiliillunilu:
- Uuliasiornermik ingerlatsivinnik suleqateqarnissamik soqutiginnippugut, taarsigassarsiilluta imaluunniit nalinginnarmik kontoqarfigineqarluta.