400.000 kronit Narsami isersimaartarfimmut
Nanu Børnikkut februarimi katersuiniarnermiit naatsorsuutaat kiisa iluarsipput. Suliniaqatighiiffik sinneqartoornerussangasimagaluarpoq.
402.622 kronit.
Tassa Nanu Børn-ikkut meeqqanillu ikiorsiiniaqatigiiffiit allat pingasut februarimi KNR-ikkut aallakaatinneqartumik aningaasanik katersuiniarujussuarneranni sinneqartoorutit. Kukkunersuisisarfiup Deloittep tamanna uppernarsarpaa.
– Nanu Børn-ikkut sinneqartoornerussangasimagaluarput. Februarimi katersuiniarnersuup kingorna inuinnarnik telefuunikkut aningaasanik tunnissuteqassallutik neriorsuisoqartarsimavoq. Neriorsuutigineqarsimasut kontomiittullu suli 130.000 kronit missiliorlugit nikngapput, Nanu Børn-ikkut siulittaasuat Krissie Winberg oqarpoq.
Aningaasat Narsami isersimaartarfissamut atorneqassanerarpai.
– Taamaakkaluartoq nuannaarutigaarput unnuup ataatsip ingerlanerinnaani kalaallit meerartaat 400.000 kronit sinnerlugit katersuissussinnaasimagatsigit.
– Isersimaartarfillu ammagassarput siulleq kalaallit nunatsinnilu suliffeqarfiit tunissutigissavaat, aningaasat toqqaannartumik sanaartornermi atortussarsissutigineqassammata. Massakkorpiaq suleqatigiinnissaq pillugu isumaqatigiissutissat ulapputigaagut, Narsami isersimaartarfissaq piviusunngortinneqarniassammat, Krissie Winberg nassuiaavoq.
Taassumap saniatigut Nuna Børn-ikkut aamma Kalaallit Nunaanni illoqarfimmi allani pingasuni 'sapaatip akunnerata naanerani isersimaartarfinnik' pilersitsissapput. Tamanna sumiiffinni suliniuteqarsinnaasut suleqatigalugit ingerlanneqarpoq, taakkulu 'isersimaartarfivinnik' pilersitsisoqarnissaata tungaanut toqqissisimasarfiussapput.
Naatsorsuutit Nanu Børnikkut nittartagaanni takuneqarsinnaapput, tassanilu aamma 2008-imi 2009-imilu naatsorsuutit takuneqarsinnaapput.