KNR-imut uranilu pillugu aallakaatitsinissamut ajuusaarnartoq
Naalakkersuisut aallakaatitassaat ‘Uran og minedrift’, sapaatiummat unnukkut aallakaatinneqartussaagaluartoq tv-kut aallkaatitassaniit peerneqarpoq. Piffissaq eqqorlugu naammassineqarsimanngimmat.
Innuttaasunik paasisitsiniutitut aallakaatitassaq 'Urani aatsitassarsiornerlu', naalakkersuisut suliakkiissutigisimasaat, pilersaarutaasimagaluartutut sapaatiummat unnukkut aallakaatinneqanngitsoorpoq.
Aallakaatitassaq sivisuumik utaqqineqarsimasoq nalunaaqutaq 20.00 aallakaatinneqartussanngormat taamaallaat skærmikkut allagartaliisoqarpoq:
_ 'Urani aatsitassarsiornerlu' aallakaatinneqassanngilaq, aallakaatitassiortitsisut (Kalaallit Nunaanni Namminersorlutik Oqartussat, aaq.) aallakaatitassiaq piffissaq eqqorlugu tigusimanngimmassuk. Aallakaatitassaq kingusinnerusukkut aallakaatinneqarumaarpoq.
Sermitsiaq.AG sapaammi siusinnerusukkut saqqummiunnikuusaattut, namminersornerullutik oqartussani sulisut aallakaatitassami ilaasussat sinneri inaarsarlugit ulapputigisimavaat, suliassarujussuusimappulli.