Flemming Jensen meerarpaluttoq
Ekstra Bladetimi atuakkanik naliliisartoq tv-kut quiasaarisartuusimasup atuakkiaanut nutaamut angummik kalaallimik inuusuttumik pingaarnertut inuttaqartumut imminut assortuutunik isumaqarpoq.
Sivisuumik sulinermini isiginnaartitsisartoq atuakkiortorlu Flemming Jensen arlalitsigut piginnaasaqarpoq. Meeqqat atuarfiani ilinniartitsisutut ilinniarsimavoq naammasseqqaajullunilu ilaatigut Uummannami ilinniartitsisuusimavoq. Kalaallit kulturiannik naapitsinerminut atatillugu atuakkiorpoq. Kingorna aamma atuakkiorpoq pisuusaartitsilluni Kalaallit Nunaat pillugu, maannakkullu Jensen atuagarusussuarmik saqqummersitsivoq 'Jakobimik' taaguutilimmik, tassanilu inuttaatinneqarpoq angut inuusuttoq kalaaleq atuagarlu 600 sinnerlugit qupperneqarpoq.
Jakob meeraanerminit nuannersunik eqqaamasalik Danmarkimi, Kalaallit Nunaanni Balimilu tv-kut aallakaatitassiorfiusussami angalaartarpoq. Asanninneq ilaatigut ilaasarpoq kiisalu pinerliiniaqatigiit ajortuinnaanngitsut. Ekstra Bladetimi naliliisartoq Hans Engell naapertorlugu atuagaq nuannersuuvoq. Jensenilli oqaatsinik atuinera tamatigoornerusinnaavoq, atuakkiornerminimi imminut killilersunnginnissaq toqqarsimavaa.
- Pisut meerarpalussinnaapput, Jensenili oqaluttuallaqqissuuvoq - ingammik piffissaqarluaraanni. Atuagarmi takeqaaq, allannikkullu sanngiiffeqarpoq: Inuit aalanerat pillugu Flemming Jensenip oqaaserpassuit atortarpai: 'tupalluni unippoq', 'kigaatsumik aggerpoq', 'allamut qiviarpoq', 'anivoq'.
- Soormi uninngatikkunigit! Taamaakkaluartoq Flemming Jensen Jakobilu aliikkutaapput - atuakkiorneralu suli pitsassiartussaaq, Ekstra Bladet allappoq.