Nunarput pillugu ilinniartitsineq naammanngitsoq
Oqaluttuarisaanermik ilinniartitsineq Danmarkip sumiginnarpaa, kalaallillu inuusuttut Danmarkimi ilinniagaqartut annikilliortinneqartarput, naalakkersuisunut ilaasortaq Mimi Karlsen isumaqarpoq.
Danmarkimi meeqqat atuarfiani oqaluttuarisaanermik ilinniartitsinermi Kalaallit Nunaata Danmarkimit nunasiaasimanera qaangiataarneqartarpoq. Taama Kristilegt Dagbladetimut oqarpoq ilinniartitaanermut, ilisimatusarnermut, kultureqarnermut ilageeqarnermullu naalakkersuisoq Mimi Karlsen oqarpoq.
- Danmarkimi inuusuttut Kalaallit Nunaat pilugu nunasiaasimaneranullu tunngasunik nunatsinnut sunniisimaqisunik ilisimasakippallaaqaat.
Tamannalu kalaallit inuusuttorpassuit Danmarkimut ilinniariarsimasut malugisarpaat.
Danmarkimi pissutsit ilisimasaqarfigilluarlugit nammineq tikittarput, Danmarkimili ilinniarfissaminnut tikikkaangamik qallunaajaqqat nunarput, naalagaaffeqatigiinneq nunasiaasimanerlu pillugit ilisimasaqarneq ajorput, Mimi Karlsen oqarpoq, isumaqarporlu qallunaat inuusuttut nunarput pillugu ilisimasakippallaarnera peqqutigalugu kalaallit ilinniagaqartut Danmarkimi inuiaqatigiinnut kattunnissaannut akimmisaartitsisartoq.
- Taamaattoqarneratigut kalaallit illinniartut ilungersuatinneqartarput, atuaqatit aperisarmata, sumi qallunaatut ilinniarsimanersut, tupigisarlugulu kalaallisut allatut sooq aalakoorneq ajortut, Mimi Karlsen oqarpoq, isumaqarporlu Danmarkimi meeqqat atuarfiani ilinniartitaanerup ilagiinnartariaqaraluaraa, kalaaliaqqat Kalaallit Nunaanniittut pinngitsaalineqarlutik qallunaatut ilinniartinneqartartut.
Ilinniartitsinermi qallunaat imminnut isornaretorsiorsinnaanerat amigaatigaa.
- Kalaallit ilinniarluarsimasut inuiaqatigiinnullu akuliulluarsimasut suliffimminnik paarsilluartut imaluunniit Aghanistanimi sorsunnermi peqataasut eqqartorneqarneq ajorput.