Siumut: Naalakkersuisut aalajangertariaqarput
Uummannap Kangerluani inuttaasut qaleralinniarneq pillugu erseqqissumik ilisimatinneqartariaqartut Kristian Jeremiassenip piumasaraa.
- Malunnartorujussuuvoq qanoq ingerlariaqqinnissap nalornissutigineqarnera, kiisalu nalorninermut tunngaviunerpaaq tassaavoq Naalakkersuisut qaleralinnik pisassiisoqaqqinnissaanut aalajangiinissaminnik kinguarsaanerat.
- Nalornissutigineqarpoq Royal Greenlandimi sulisuulluni soraarsitaanissaq imalunniit soraarsitaannginnissaq, uangalu paasitinneqarpunga tamanna ulluinnarni nalornisitsilersimasoq.
Inatsartunut ilaasortoq Kristian Jeremiassen, Siumut, oqarpoq.
Uummannap Kangerluani aalisarneq decembarimi univingajattarpoq anorlertanera pissutigalugu. Piffissaq taanna pisussutsit tunngavigalugit aalisarnerup unittarfia nallertinnagu aalisarneq unissanngippat, pisariaqarpoq pisassiissutit 2000 tonsinik annertusineqarnissaaq, Jeremiassen isumaqarpoq.
- Naalakkersuisut pisassiissuteqaqqittoqqarnissaanik aalajangiinissartik akisussaaffigaat, uangalu Naalakkersuisunut inassutiginiarpara akisussaafeqarlutik piaarnerpaamik aalajangeeqqullugit, innuttaasummi toqqissisimannginnerat nalorninerallu unitsinneqartariaqarmat, ilaatigut tusagassiutitigut nalunaarummi Kristian Jeremiassen allappoq.