Per kapisilittaminut 8800 kronisivoq
Per Nukaaraq Hansen Ivittuuneersoq NASCO-mit kapisilimmut akissarsiaritinneqartartumut 1500 dollarsinik tunineqarpoq. Kapisilik Canadami nalunaaqutserneqarpoq.
Aalisarnermut, piniarnermut nunalerinarmullu Naalakkersuisoq Ane Hansen takussaasumik tunineqarneranut tunniussisuuvoq.
Per Nukaaraq Hansen 2009-mi Ivittuut eqqaani kapisilittami nalunaaqutaa nassiuppaa. Kapisilik maajimi 2008-mi Canadami Restigouche Riverimi nalunaaqutsigaavoq. Nalunaaqutinit nassiunneqartunit makitsineq pivoq ukioq manna aasaanerani NASCO-p ukiumoortumik Quebec Citymi Canadamiittumi ataatsimiinneranni.
NASCO (North Atlantic Salmon Conservation Organistation) kapisilinnik nalunaaqutsiiinermik suniummik ingerlatsisuuvoq siunertaavorlu ilisimatuussutsikkut kapisilinnik nalunaaqutsiinerit utertinneqarnissaannut kajumissaarinissaq. Kapisillit nalunaaqutserneqartarput sumut ingerlaarnerat ilisimaneqarneruniassammat.
Ukiut tamaasa kapisilinnik nalunaaerutsiinermut sulimiummut atatillugu NASCO-mi nunat immikkoortuni sisamani 1500 dollarsinik aqquaassisoqartarpoq.
Periarfissaq nutaaq
Sunngiffimminni inuutissarsiutigalugulu nunatsinni aalisrtut tamarmik kapisillit nalunaaqutaannik Pinngortitaleriffimmut nassiussinissaminnut periarfissaqarput, taamaalillutik aappaagu NASCO-p Ilulissani ataatsimiinnerani makitsinissamut peqataanissaminnut periarfissaqarlutik.
- Aqutsisoqarfik kiisalu Aalisarnermut, Piniarnermut Nunalerinermullu Naalakkersuisoqarfik erseqqissaaqqipput, sunngiffimmi inuutissarsiutigalugulu aalisarnermi kapisillit tunisat GFLK-mut Aalisarnermut nakkutilliisoqarfimmut nalunaarutigineqartartussaammata. Nalunaaruteqarnissamut immersugassat kommunini pissarsiarineqarsinnaapput, imaluunniit www.nanoq.gl aqqutigalugu aaneqarlutik, tusagassiuutitigut nalunaarummi allassimavoq.
Ukioq manna kapisilinniarneq ingerlanneqassaaq aggustip aallaqqaataannnit oktobarip 31-anut.