’Mødet’ ilassilluarneqartoq
Ruth Montgomery-Andersenip filmiliaa piviusulikkersaarut ’Mødet’, arfininngormat Sisimiuni Taseralimmi nunarsuarmi tamarmi takuteqqaarneqartoq pingariarlunilu takutinneqartoq ilassilluarneqaqaaq.
Aggustip 28-ani nunarsuarmi 'Mødet' takuteqqaarneqarnerani qaaqqusat 38-it akiliillunillu takuniaasut 108-it isiginnaarput, pingasoriarlunilu takutinneqarnerani katillugit inuit 198 isiginnaariarput.
- Taseralimmi filmertarfimmut tamanna naammaginarluinnarpoq, Taseralimmi pisortaq Arnajaraq Støvlbæk isumaqarpoq.
Ruth Montgomery-Andersenip aamma Arnajaraq Støvlbækip filmip nunarsuarmi takuteqqaarneqarnissaani suleqatigiissimanertik naammagisimaarpaat. Isumaqatigiissutigaat Sisimiuni takuteqqaarnerarnera tulluartuusoq, pingaarnertummi inuttaasoq Alma Olsen Sisimiuneersuuvoq, Ruth Montgomery-Andersenillu Sisimiuni najugaqartilluni ilisarisimalerpaa.
Arnajaraq Støvlbæk aamma Alma Olsenip ernutaraa, taamaattumik aaqqissuussineq uummateqarfigilluarlugu, naak attuumavallaarnini peqqutigalugu tunuarsimaartarsimagaluarluni.
'Mødet' KIIIN-mit, Nunafondenimit aamma Den Kongelig Grønlandsfondimit aningaasalerneqarpoq.