ARNANUT nutaaq saqqumissaaq
Aaqqissuisoq pissangavoq ilassilluarneqarnissaanillu neriulluni.
Nalunaaquttat akunnerisa 24-it ingerlanerini ARNANUT nutaaq Nuummi pisiniarfinniilissaaq, aqagulu nunatta sinneranut timmisartuunneqarumaarluni.
Atuagassiamik nutaamik takunnereersimasut tupinnanngitsumik ilagaat aaqqissuisoq nutaaq, Heidi Møller. Taanna siullermeerluni ARNANUT-mik saqqummersitsisussaavoq taamaattumillu pidssangasorujussuulluni.
– Inersimasuugaluarlunga atuagassiaq nutaaq ippassaq tigugakku nuannaartorujussuuvunga. Normup taassumap suliarinera pissanganarnikooqaaq, Heidi Møller oqarpoq, soorunalumi atuartartut taanna tigujumaarneraar pissangassutigisorujussuullugu.
Normumi uani pingaarnerutillugit imminut nalilittut isigisarneq imminullu tatigineq sammikuuagut. Sunali pissutigalugu?
– Ullutsinni nukingit tamaasa atorfissaqartippagut, amerlaqisulli imminut tatigiunnaarneq unissutigisarpaat. Taamaattoqartariaqanngilaq. Tamattami piginnaaneqarpugut, immaqalu allaaserisagut iluaqutaasinnaassapput, akivoq.
Atuagassiaq aamma aliikkutassanik, aamma angutit soqutigusinnaasaannik imaqarpoq.
– Aappariinnermut tunngasut nalilersuiffigineqarnikuupput, tamakkulu angutinut arnanullu soqutiginaateqarput. Nalilersuisarneq soqutiginngikkaluaraanniluunniit alapernaaginnarluniliunniit misilinneqarsinnaavoq. Tamattali asanninneq qanoq innersoq paaserusuttarparput, quiasuppalulluni oqarpoq.
Aamma aappariit aappariinnertik qanoq ingerlanersoq oqaluttuarisimavaat.
Tamakku allarpassuolu ARNANUT-mi, saqqummersimasut 29-issaanni atuarneqarsinnaapput.