Aningaasatigut nalorninartorsiorsinnaaneq upalungaarsimaffiginiarpaat
Siumumeersup Malik Berthelsenip silarsuarmi aningaasatigut nalorninartorsiorsinnaaneq aningaasaqarnermik aqutsisarnerup meeqqat atuarfianni ilinniartisissutigineratigut upalungaarsimaffiginiarpaa.
Inatsisartuni ilaasortaq Siumumeersoq Malik Berthelsen siunnersuuteqarpoq, missingersuusiortarnerup meeqqat atuarfianni ilinnaiartitsissutigisarneratigut iluaqutariit inuuniarnikkut ajornartorsiortarnerat pingaveersaartinneqassasoq. Politikereq isumaqarpoq, ilaqutariippassuit aningaasaqarnikkut nakkatalaartarnerat aningaasaqarnermut tunngaviusunik ilisimasaqanngippallaarnermik peqquteqartartoq. Taamaattumillu naalakkersuisunut paragraf 36-mik apeqquteqarluni isumaliutigeqquaa, aningaasaqarnermik aqutsisarneq siunissami meeqqat atuarfianni angajullernik ilinniartitsisarnermi ilaalersinnaannginnersoq.
– Aningaasanik atornerluisarneq erseqqissorujussuuvoq, Malik Berthelsen allappoq taamalu akissarsisoqartillugu, pensioninik tunniussisoqartillugu, augustimi akileraarutinik utertoortoqartillugu kilisaatinilluunniit tikittoqartillugu allaffiit ulluunerani sulisussaaruttarnerat innersuussustigalugu. Qaammatip sinnerani ajornartorsiorsinnaaneq eqqarsaatiginagu aningaasat piffissap sivikitsup ingerlanerani atulussinnarneqartarput.
– Tamanna inersimasut ileqquinik allanngortitsinikkut iluarsiuminaatussaavoq. Kinguaariilli tulliuttut atorluaanerulsariaqarput, taamaattumllu tamakku - inersimasunngunnginnerminni - isertitanik aqutsinerliornerup kingunerisartagaanik ilinniartinneqartariaqarput, Malik Berthelsen oqarpoq, kilisaatinilu inuttaasut agguaqatigiissillugu ukiumut 600.000 kroninik isertitaqartarnerarlugit.
ner.