Ilisimatuutut misissuisartut nannunut sakkulersornissaq ilinniarpaat
Nannunit saassunneqarsinnaaneq aarlerinarnerulermat Danmarks Miljøundersøgelser-ip ilisimatuutut misissuisartut misissuisoqarfimmilu sulisut isumannaallisaaviginerulerpai.
Allunaasat naaffissiat sakkulersornermillu pikkorissarneq atorlugit qallunaat ilisimatuutut misissuisartut nannunit saassunneqarsinnaanermut sillimanerulissapput.
Nannut qallunaat Tunumi misissuisiqarfiannut Zackenbergimut qaninngoorajunnerulersimapput. Arfininngormat qallunaaq misissuisartoq Jens Fog Jensen eqqugaavoq, nannumilli piaqqamit saassunneqarami suuarani annilaarujussuaannarpoq.
Danmarks Miljøundersøgelserilli misissuisartut misissuisoqarfimmilu sulisut isumannaatsuunissaat pingaartinnerulerpaa.
Sakkut periutsillu pitsanngorsaavigineqarput, misissuisartullu misissuisarfimmut suliartorlutik tikikkaangamik sakkunik atuinermik pikkorissartinneqartalerput.
– Isumannaallisaanerullu suli pitsaanerulernissaa pillugu sapaatip akunnerani pisimasoq nalilersuiffigeqqissavarput, Morten Rasch misissuisoqarfimmi ilisimatuutut misissuisarnermi pisortaasoq oqarpoq.
Ilaatigut ilisimatuutut misissuisartut misissuiffissaminni allunaasanik naaffissianik ikkussueqqaartarnissaata piumasarineqalernissaa eqqarsaataasunut ilaanerarpaa.
Taamaaliornikkut nannut suli qanillivinnginnerini malugineqarsinnaasassammata ungoorneqarsinnaasassallutillu.
Siusinnerusukkut ukiut sisamat qaangiukkaangata aatsaat nannunik misissuisoqarfimmut qaninngoortoqartartsimagaluarpoq. Ukiormannaannarmi nannunik pingasunik qaninngoortoqareerpoq.
– Nanoqarnerulernikuummat tamanna imaanaanngitsutut isigisariaqarparput. Nannut ulorianarluinnartuummata, Morten Rasch oqarpoq.
Nannut immap sikuani piniartaraluarput, piffissamili kingullermi ilisimatuutut misissuisut nannunik nunami nerisassarsiortunik takukulanerulerput - allaat ilisimatuutut misissuisunik saassussiniartalerlutik.
– Silap pissusaasa allanngornera peqqutaagunarpoq. Nannut sikumi puisinniartussaapput. Imarli sikuisanneruleraangat nannut avannamut nunaleriarajunnerulersarput, nannunut immallu miluumasuinut professori Rune Ditz Danmarks Miljøundersøgelser (DMU)-meersoq oqarpoq.