Aasaanerani meeqqanut suliniuterpassuit
Nunatsinni kommunit aamma peqatigiiffiit aasap ingerlanerani meeqqanut ikiortariaqartunut sammisassaqartitsinerminnut atatillugu pilersaarutiminni neqeroorutinik ingerlattagaannut tuttunniarneq aamma tupersimaarneq ilaaginnarput.
Meeqqat atuanngiffeqarnerisa nalaanni kommunit peqatigiiffiillu arlallit meeqqat nuannersunik unamminartunillu sammisassaqartinneqarnissaat pillugu nuna tamakkerlugu neqerooruteqarnissaminnut piareersimasarput. Sammisassaqartitsinerit meeqqanut inuusuttunullu immikkut pisariaqartitsisunut sammitinneqartarput, kisianni aamma soorlu aasaanerani ”håndboldskole”-qartitsinnermik meeqqanullu tamanut nipilersornermik tusarnaartitsinermi peqataanissamut neqerooruteqartarpoq.
Isumaginninnermut Naalakkersuisup Maliina Abelsenip kommunit aamma peqatigiiffiit suliniutigisartagaat pillugit nersualaarpai nunattalu karsiata suliniutinut tapiissutai qaffallugit.
- Sammisassaqartitsisoqanngikkaangat meeqqat avangaanngusuttarput aamma meeqqatut peroriartornermik nalaani peqqinnartunik atugassaqassappata sammisassaqartinneqarnissaat unammilligassaqarnissaallu pingaaruteqarluinnarput. Kommunit peqatigiiffinnilu suliniuteqarluartut aasaanerani meeqqanut nuannersunik misigisassaqartitsisarnermi tapertaalluartarnerat nuannaarutigilluinnarpara. Sammisassaqartitsinerpassuit ingerlanneqartartut assigiinngiiaarnerat ajasoorutigaara – alutornat, taamaattumillu aamma tapiissutit immikkut qaffaaffigilaarnissaat Naalakkersuisunit isumaqataaffigineqarmat nuannaarutigaara, Maliina Abelsen oqarpoq.
Meeqqanut inuusuttunullu immikkut pisariaqartitsisunut sammisassaqartitsinernut atugassanik Toqqissisimasumik Meeraaneq 2010-mut sinaakkusiussat iluini kommunit qinnuteqartarput aamma aasaanerani sammisassaqartitsinissanut tapiissutinik agguaassinissamik suliaqarneq Isumaginninnermut Naalakkersuisoqarfiup isumagisarpaa.