Umiarsualivimmi nunatsinni rekordiliisoq
Umiarsuup assartuutip ´Patricia´-p Nuummi talittarfimmi motorersuaq 300 tonsinik ataatsikkut kivippaa.
Ataasinngormat ullaap tungaani umiarsuaq assartuut `Patricia´ Nuummi Umiarsualivimmi qaqutigoortumik nunatsinni rekordiliivoq. Umiarsuup kraanerujussuisa marluk motorersuaq 300 tonsinik oqimaassusilik umiarsuup lastianiit talittarfimmut ataatsikkut kivillugu inissippaa.
- Nuummi Sarfaannguani innaallagissiorfik nutaamik motoritaarlunilu generatoritaassaaq katillugit 358 tonsinik oqimaassusilinnik, nukissamik pilersuiffik Nukissiorfiit oqaluttuarpoq.
Umiarsualivimmi sulisorpassuit assartukkanik ingerlatsivimmi Blue Water Shippingimi, Italiami Trieste-mi fabrikkimit Nuummi Umiarsualivimmut assartuisumi, sulisut peqatigalugit rekordiliineq malinnaaffigaat.
´Patricia´-p aamma usivaa blokvogni 16-inik assakaasulik, ataasinngormallu unnukkut tyskit immikkut ilisimaallit motoori generatorillu oqimaatsut politiinit ingiallorneqarlutik kigaatsumik, kigaatsuararsuarmik, Umiarsualivimmiit Sarfaannguanut oqquppaat.
Sarfaannguani innaallagissiortup atortortaavi 8,3 x 5,1 x 5,9 meterinik angissuseqarput.
- Assartukkat ingerlassinnaaqqullugit ledningit nivingasut piiarneqarput ingerlaffissallu asfaltia ninngussarneqarsimalluni assartukkanik oqimaatsunik attassisinnaaqqullugu, Nukissiorfiit paasissutissiinermut pisortaat Louise Johansson sermitsiaq.ag-mut oqaluttuarpoq.
Innaallagissamik kiassarneq alliliinissamik pisariaqartitsivoq
Sarfaannguani innaallagissiorfiup, Utoqqarmiut Kangerluarsunnguani erngup nukinganik nukissiorfimmut pissamaatitut innaallagissiorfiusup, allineqarnissaanut pissutaavoq Nuummi innaallagissamik annertunerpaamik atuinerup annertuseriarujussuarsimanera.
- Erngup nukinganik nukissiorfik atuleratsiguli innaallagissamik aalajangersimasumik kiassarnerup, Nuummi nutaamik sanaartukkani tamani atugaalersup, pisariaqartissimavaa ukiukkut ulluni issittuni annertuumik innaallagissiortarnissarput, Nukissiorfinni pilersaarusiornermut pisorttaq Lars Hoffmeyer nassuiaavoq.