Norskit pingasut suli ujaarineqarput
Politiit ujaasinertik ataasinngormat helikopterimik nangippaat - tuminik naammattuuisoqarsimavoq, ilisimaneqanngilarli taakkunannga pingasunit aliikkuaralugu aalisarianeersuunersut
Kangerlussuarmi politiit ullaaq manna, ataasinngornerup ullaavani, norskinik pingasunik, Kangerlussuarmi qissattariarlutik periarfeerussanik, helikopterimik ujaasinertik nanginniarpaat. Angutit tallimanngormat tassani takornarianik angallassisartumik aaneqartussaasimagaluarput, qissattariartulli ulloq taanna aqaguaniluunniit naapiffissatut isumaqatigiissummut takkussimanngillat.
Sapaatiummat kangerlussuarmi akunnerit tallimat sinnerlugit helikopterimik ujaasisoqarpoq. Kinguneqanngitsumilli. Politiit ujaasinertik annertusinianngikkallarpaat.
- Helikopterimik ujaasineq pitsaanersaavoq. Nuna annertoorujussuaq ujaasiffigarput, politeeq pigaartoq Erik Rasmussen norkit aviisiannut Aftenbladetimut oqarpoq. Poliit oqaatigaat tuminik naammattuuisoqarsimasoq. Ilisimaneqanngilarli norskit, takornariat allat nunaqavissulluunniit tumigineraat. Naapiffissatullu isumaqatigiissummi nassaarineqarsimannginnguatsiarput.
- Suut tamarmik eqqumiikujupput. Naapeqatigiiffissatut isumaqatigiissutip eqqaani helikopteri ujaasivoq tuminik nassaarani. Immaqa tammarsimapput. Tamakkuali eqqoriaanerinnaapput, Nuummi vicepolitikommissær Kristian Dahl norskit aviisiannut oqarpoq.
Norskit taakkua pingasut arfininngormat siuliani aalisariarsimapput ullullu arfinillit peqartussaasimanatik. Politiit malillugit inunnit misilittagaqanngitsunit tamaani angalaneq ulorianarsinnaavoq.
- Ulorianarsinnaavoq qaqqat kuuillu kuuttuut ikaarneqarsinnaanngitsut pissutigalugit. Nunatsinni pinngortitami angalaarneq sungusimanngikkaanni suut tamarmik ulorianarsinnaapput. Piffissamili kingullermi tamaani silagissimavoq siusinnerusukkullu misigisarsimavarput ullualunnguit qaangiuttut inuit ajoratik utertut, Erik Rasmussen oqarpoq.
Norskit angutit pingasut, 24-inik, 24-inik 31-inillu ukiullit, unnuinissaminnut taquarpassuaqarsimapput atortussaqarlutillu. Politiit maanna misissulerpaat pinngortitami angalaarnermik qanoq sungiussisimatiginersut. Norskiot GPS-imik imaluunniit satellittelefonimik nassarsimanngillat, tamaanilu mobiltelefonimik attaveqartoqarsinnaanngilaq.
Tammaasat ilaata qatanngutaa angut Jægerbladetimut oqarpoq:
- Qularnanngilaq ilaqutariinni qaninnerpaani pissangasoqarmat. Ernumalerpugut, qatanngutaa angut oqarpoq.