Sisimiuni qanittuanilu avatangiisit sapaatip akunnera
Ataasinngorpamiit innuttaasut inuutissarsiortullu akeqanngitsumik eqqagassanik angisuunik tunniussisinnaassapput.
Sisimiut, Kangerlussuaq, Itilleq aamma Sarfannguaq ulluni juulip 5-aniit 9-anut avatangiisinut sapaatip akunneqartitsissapput.
- Ulluni tallimani eqqaavimmut akitsuutitaqanngitsumik tunniussisoqarsinnaassaaq. Innuttaasut inuutissarsiortullu tassani neqeroorfigineqarput. Eqqagasat angisuut sulluunniit, soorlu biilit, angallateeqqat, angallatit, qamuteralaat maskiinarsuillu sapaatip akunnerani tassani akitsuutitaqanngitsumik tunniunneqarsinnaassapput. Sisimiut illoqarfiani eqqagassat angisuut pineqartillugit soorlu angallatit, lastbiillit maskiinarsuilluunniit piginnittoq kommunimi teknikkeqarfik attaveqarfigissavaa, taakkulu eqqagassat angisuut eqqaaviliaatissavaat, qeqqata.gl allappoq.
Sisimiuni kommunip allaffiata kissaatigaa, namminersortut suliffeqarfiiluunnit uppernarsarsinnaassagaat eqqagassaq angisooq nammineq pigalugu. Tamaattumik inuit oqarasuaatikkut saaffiginnissinnaapput imaluunniit allallutik eqitassallu assinga tunniullugu.
Savimerngit eqqagassat eqqaavimmukaannerat tonsimut nalinginnaasumik 1.500 kroneqartarpoq. eqqagassanulu allanut ikuallassinnaasunut ikuallassinnaanngitsunullu kubikmeterimut 30 kroneqarluni.