Kalaallit aningaasaataat Haitimi
Qattanut, imerfinnut, ippernaaqqutinut, ulersuarnut peqqinnissamullu atortunut aningaasat atorneqarput, Dansk Røde Kors nalunaarpoq.
Aningaasant katersorneqartut 1,6 million kronit pillugit Kalaallit Røde Korsiannut apeqquterpassuaqarsimavoq, aningaasallu apuuffissarinngisaminnut apuussimanersut. Danmark, Kalaallit Nunaat Savalimmiullu katillugit 35 million kroninik tunissuteqarput nunap sajunneratigut eqqugaasorpassuarnut annaassiniarnermut atorneqartussanik. Assersuutigalugu inoqqortussutsimut agguaqatigiissillugu Danmarkimi inuk ataaseq 5 kroninik tunissuteqarpoq nunatsinnili katersinermi inummut ataatsimut 27 kronit missaanik tunissuteqartoqarluni.
- Aningaasat ilaat qattanik 4.000-inik, imerfinik 6.000-inik, ippernaaqqutinik 10.000-nik,ulersuarnik 5.000-inik tunngaviusumillu peqqinnissamut atortunik soorlu mattusinik, nimernik niaqunngunaveersaatinillu sumiiffinni pingasuni inunnut 10.000-inut, igaffimmi atortunut 3.000-inut nunallusajuffianut inuit ikiuiartortut 35-it aallartinneqarnissaannut atorneqarput. Taassuma saniatigut Dansk Røde Kors tupersuarmik ikkussivoq nunarsuarmit tamarmit ikiuiartortut siniffigisinnaasaanik neriffigisinnaasaanillu. Ikiuartortut døgnimut akunnerit 16-it suliaqarajuttarput ilungersunartunik atugaqarlutik, taamaattumik pingaartuuvoq eqqissimaarfissaqarnissaat pitsaasumik tuniussaqarsinnaaqqullugit, Dansk Røde Kors tusagassiuutitigut nalunaarummi allappoq.
Dansk Røde Korsip Haitimi ikiuiniarnera nunarsuaq tamakkerlugu Røde Korsip ikiuiniarnerata ilagaa, nunaniillu 60-nit inuit piumassutsiminnik suliartut 900 sinneqartoq Røde Korsimit aallartitaapput, Haitimilu Røde Korsimit piumassutsiminnik sulipput inuit 10.000-it. Nunarsuaq tamakkerlugu Røde Kors katillugit 4,7 milliard kronit katersorsimavaat, ilaagitut inigisaagallartussanut, nakorsaatinut, napparsimmavinnut, nerisassanut tarnikkullu ikiuinernut atorneqartussat.