Haitimut ikiuiniutit atorluarneqarput
Dansk Røde Korsimi præsidenti qanittukkut Nuummippoq. Tamanut ammasumik ataatsimiisitsinermi ilaatigut nunatsinniit katersorneqartut 1,6 millioner kronit sumut atorneqarsimanersut oqaluttuaraa.
Kalaallit Røde Korsiata Haitimut katersuiniarnerani katersorneqartut sumut pippat? Apeqqut taamaattoq juunip 26-ani Pilutami atatsimiinnermi Susanne Larsenip akivaa.
Seqinnerluni angallavigiuminaraluaqisoq feeriarfiullunilu sapaatip akunnerata naaneralugu aaqqissuussaq ornigarneqarluarpoq, taama oqarpoq Kalaallit Røde Korsiani allaffimmi aqutsisoq Kirsten Mortensen.
Susanne Larsenip Kalaallit Nunaanni Kalaallit Røde Korsiata katersuinerierani 1,6 million kronit katersorneqartut qujassutigai. Agguaqatigiissillugu Kalaallit Nunaanni inummut ataatsimut 27 kroninik katersisoqarpoq, Danmarkimi taanna 5 kroniulluni.
Susanne Larsen Dansk Røde Korsimi allataaneq Anders Ladekarl peqatigalugu Haitimiippoq, maannakkulu qanoq inissisimasoqarnersoq oqaluttuaraa.
Danmark, Kalaallit Nunaat Savalimmiullu katillugit 35 million kroninik tunissuteqarput nunap sajunneratigut eqqugaasorpassuarnut annaassiniarnermut atorneqartussanik.
- Aningaasat ilaat qattanik 4.000-inik, imerfinnik 6.000-inik, ippernaaqqutinik 10.000-nik, ulersuarnik 5.000-inik tunngaviusumillu peqqinnissamut atortunik soorlu mattusinik, nimernik niaqunngunaveersaatinillu sumiiffinni pingasuni inunnut 10.000-inut, igaffimmi atortunut 3.000-inut nunallusajuffianut inuit ikiuiartortut 35-it aallartinneqarnissaannut atorneqarput.
Taassuma saniatigut Dansk Røde Kors tupersuarmik ikkussivoq nunarsuarmit tamarmit ikiuiartortut siniffigisinnaasaanik neriffigisinnaasaanillu. Ikiuartortut døgnimut akunnerit 16-it suliaqarajuttarput ilungersunartunik atugaqarlutik, taamaattumik pingaartuuvoq eqqissimaarfissaqarnissaat pitsaasumik tuniussaqarsinnaaqqullugit.