Qaannamik kisimiilluni ilisimasassarsiortoq
Ilinniartitsisoq tuluk ulluni makkunani kisimiilluni qaannamik Uummannap nunaqarfiinut tallimanut angalaniarpoq.
Ilisimasassarsiorneq ateqarpoq The Seven Settlements Solo Kayak Expedition angullu ateqarluni Chris Paton 37-inillu ukioqarluni.
Uummannap kangelruani 450 kilometerit qaannamik angalaniarpai Uummannamilu nunaqarfiit arfineq marluk anglaffiginiarlugit. Ajornartorsiuteqarporli, taamaattumik Chris Patonip nunaqarfiit tallimaannaat angalaffigissavai.
- Qaammataasakkut attaveqaatit atorsinnaanngillat, våddragteralu alissimavoq. Pujorujussuarnera ilanngukkaanni ilulissat akornanni angalanissaq navianarpoq, taamaattumik nunaqarfiit avannarpasinnerusut orninnianngilakka,Chris Baton bloggimini allappoq.
Angalaffissaq 320 kilometerinut sivikillivaa, ullullu 24-t angalassaaq.
Qaannamik ilisimasassarsiornermi kalaallit kulturiat pinngartitarlu qitiutinneqarput.
- Aamma inuit nuannarilersimallugillu ataqqinersimasakka naapissavakka, tassalu qajartortartut siulliit suli qajartornermik ataqqinartumik ingerlatsisut, Chris Paton allappoq.
Chris Paton University of Strathclydemi Outdoor Educationimi bacheloriuvoq, Danmarkimiillu Jelling Seminariami ilinniartitsuulluni. 2006-imili Uummannami Edvard Krusep atuarfiani tuluttut ilinniartitsisuuvoq.