Aavarfik qallivoq
Ukiut sisamassaat Naalakkersuisut aalajangiusimavaat tuttunniarnermi umimmanniarnermilu piumasaqaatit atuuttut ingerlatiinnarniarlugit. Taamaattoq allannguuteqalaarpoq.
Tuttut:
Tuttut piniarneqarunnaassapput 15. november, taassumali saniatigut immikkut piniartoqarsinnaavoq region 2-mi, inuussutissarsiutigalugu piniartut ukiuunerani piniarsinnaallutik 18. februar 2011 tikillugu, piniarnermut naalakkersuisoqarfik nalunaarpoq.
Upernavimmeersut Nuussuarmi tuttuttassaanik tunineqarput.
Umimmaat:
Ukioq manna perngaammik umimmattassanik tunniussisoqarpoq Ilulissanut aamma Qeqertarsuarmut, tassalu Naternami umimmaqarfimmi. Pisassat taakkua eqqarsaatigalugit piniarfissaq 15. novembarimut sivitsorneqarpoq.
Tuttunniarnissamut umimmanniarnissamullu piniarnissap piffissaataa aallartinnissaa unitsinneqarnissaalu pillugit apeqqutaavoq ukiuni siuliinisut nunap immikkoortuani sumi suullu piniarneqassanersut, kiisalu apeqqutaatinneqassalluni inuussutissarsiutigalugu piniartuuneq, sunngiffimmi piniartuuneq imaluunniit akiliisitsilluni piniarnermik aaqqissuisuunerluni, naalakkersuisoqarfik allappoq.
Pisassiissutit, nunallu immikkoortuini ataasiakkaani qaqugukkut piniartoqalersinnaanersoq pillugu takussutissaq 1 ataatungaaniittoq ammarneqarsinnaavoq.
Akuersissuteqarnissamut aallaaniarnissamullu uppernarsaammut akiliinissamut piumasaqaatit:
Sumiiffiit ilaanni ammasumik pisassiineqaraluartoq, piniarsinnaanissamut akuersissummik pigisaqartut tuttunnissaminnut umimmannissaminnullu akuersissummik peqartariaqarput. Taamaammat piniartut akuersissummik kommuneqarfimminnut qinnuteqartariaqarput.
Piniarsinnaanissamut akuersissut kingusinnerpaamik 1. maj akilerneqarsimasussaavoq, 2010-2011-imi tuttunniassagaanni/umimmanniassagaanni. Tamannali tuttunniarnissamut umimmanniarnissamullu immikkut atuutinnginnissaa akuersissutaavoq.
Sumiiffinni ammasumik piniarnissamut ukiuni marlunni najugaqarsimanissaq immikkut akuersissuteqarnissamut suli piumasaqaataavoq.
Sumiiffinni ammasumi piniarsinnaaffiusuni kommunit piniartunut tamanut akuersissutinik arlalinnik tunniussisinnaapput. Ukioq manna Maniitsup ingerlatsiviani (Kangerluussuaq) akuersissut ataaseq atorlugu umimmaat tallimat pisarineqarsinnaappput, taamattaaq ukiut siuliinisut tuttut tallimat akuersissummi ataatsimi nalunaarutineqarsinnaapput.
Nalunaaruteqartussaatitaaneq
Uumasut pisarineqarsimasut tamaasa immikkut immersugassakkut nalunaarsorneqassapput (akuersissummut ilanngullugu tunniunneqartussaq), piniarfissap naammassereernerani kingusinnerpaamik sapaatit akunneri pingasut qaangiutinnginnerini kommunimut tunniunneqartussaq.
Immikkut nalunaaruteqarnissamut immersugassat tuttut umimmaallu pisarineqartut malinnaaffiginissaannut atorneqartussaapput, taamaaliornikkut aqutsisoqarfiup piniarnermi allannguutissanik iluarsiisinnaammat, pisuussutit uumassusillit siusinnerusumi atorluarneqarnissaat tamakkiisumik qulakkeersinnaammassuk.
Taamaammat pingaaruteqarpoq inuussutissarsiutigalugu sunngiffimmilu piniartut tuttuttatik umimmattatillu pillugit immikkut nalunaarsuinermi immersugassap immersortarnissaa, naalakersuisoqarfik allappoq.