K

Taseraliup aasaanerani saqqummersitsinerani eqqumiitsuliortoq Kîstat Lund saqqummersitsisuuvoq. Kîtstat Lund Narsami najugaqarpoq.

Saqqummersitsineq 18. juulimiit 15. aggustimut takuneqarsinnaavoq, ammarneqassalluni sapaatiuppat 18. juli nal. 15.00 eqqumiitsuliortoq najuuttoralugu.

Kîstat Lund nunatsinni tamarmi eqqumiitsuliornermigut tusaamaneqarluarpoq sunniuteqarluarsimallunilu. Allaffeqarfiit, ilinniarfiit, timersortarfiit allallu kusassarsimavai, nunatsinni Danmarkimilu aammalu nunani assigiinngitsorpassuarni saqqummersitsisareersimalluni. Sisimiuni 1997-imi Sanaartornermik Ilinniarfiup iigarsuani eqqumiitsuliaa takuneqarsinnaavortaaq.

Aammattaaq meeqqanut atuakkianik ilusilersugaqarpoq aammalu kalaallit eqqumiitsuliortut pillugit atuakkiani arlalinni ilaalluni, taakkunannga taaneqarsinnaasut ilagaat ”Grønlands Kunst” (Kaalund, Bodil. Grønlands Kunst. 1990) kiisalu Kulturikkut illorsuup Katuap saqqummersitaa ”Ilunni nutarterutaavoq asi” (Biilman, Johanne Egede & Lund, Kistat. Atuakkiorfik A/S, 2002).

Kîstat Lund-i 1987-imi Namminersornerullutik oqartussat kulturikkut nersornaasiuttagaanik nersornaaserneqarpoq 1997-imilu Ridder af Dannebrog tunniunneqarluni.

Kîstat Sisimiuni saqqummersitsereernikuuvoq aatsaalli suliai taama amerlatigisut takuneqarsinnaassallutik.