Narsami 'uranimut peqatigiiffik' nutaaq

Ataasinngornermi juulip 12-ani Narsarmi peqatigiiffik nutaaq aallartinneqassaaq, Kuannersuarni aatsitassarsiornissaq pillugu paasissutissanik piviusunik pissarsiniartussamik.

Narsaq ungataanilu Kuannersuit iluliarsuakkut isigalugu. Qaqqat eqaata missaani taarnersaq tassaavoq isø 1960-ikkunni uraneqarfimmik misissuimmat qaarusuup ammarnga. Taamani isummertoqarpoq urani piiasallugu navianarpallaartoq. Assi: John Rasmussen, Narsaq.

Peqatigiiffik 'Narsami Urani Naaggaarpara' peqatigiiffimmit allamit ataasinngorpat aallarniutaasumik ataatsimeersuartussami unammillerneqalerpoq.

Suliniuteqartunut ilaapput Narsami kommunalbestyrelsemi ilaasortaasimasut Josef Petersen, Atassut, aamma Suka Frederiksen, Siumut.

Suleqatigiit inuutissarsiortunit iniunnarnillu ilaasortaqartut kissaatigaat Narsap eqqaani aatsitassanik misissuinermi piiaanermilu tusarniaavigineqartartussatut akuerineqarnissartik.

- Piviusut tunngavigerusuppavut qunusaarinerit uranimut akerliusut ingerlataat pinnagit, Josef Petersen oqarpoq.

Peqatigiiffiup sulinissaminut qulequtaraa 'Kuannersuit pillugit oqalliffik'.

- Oqaloqatigiinneq atorusupparput, upperiliinnakkat eqqunngitsullu unitsinniarlugit. Piviusut tunngavigalugit oqallittariaqarpugut tusamataannarmik pinnata, Josef Petersen oqarpoq.

Kuannersuarni aaqqiagiinngissutaaqisumi aatsitassat atorluarneqarnissaat peqatigiiffiup illersugaraa.

- Kisianni suut tamaa akuersaanngilagut, aalajangiiniarnitsinni piviusut tunngavigisarniarpavut, Josef Petersen oqarpoq.

Kuannersuarni aatsitassaqarpoq ulorianartunik qinngorneqartunik, uran aamma thorium. Aatsitassalli qaqutigoortut Australiamiut pigisaanit Greenland Mineral and Energymi misissussallugit soqutigineqarput.

Aatsitassat qaqutigoortut uranitaqartarput. Uranillu piiarneqarnissaa inerteqqutaatillugu suliffeqarfik piiaasinnaanngilaq. Inerteqquteqarneq ukiamut Inatsisartut aalajangiiffigissavaat.

Powered by Labrador CMS