Savalimmiuni inatsit inatsisinik tunngaviusunik unioqqutitsivoq

Dansk Folkepartimit statsministerimut piumasaqaatigineqarpoq Savalimmiormiut tunngaviusumik inatsisissartik pillugu isumaqatigiinniarnerannik unititseqqullugu.

Savalimmiut qeqertaanni inuiaqatigiit namminneq tunngaviusumik inatsiseqalerusupput. Assiliisoq: Regin Torkilsson

Savalimmiut tunngaviusumik inatsisinik unioqqutitsisapput nunarsuarmilu inuiaqatigiinnik toqqissisimajunnaartitsissallutik, qeqertarmiut tunngaviusumik inatsisissartik, ukiuni arfineq-pingasuni suliarineqarsimasoq piviusunngortissagunikku.

Taamatut Justitsministeriet inerniliivoq, statsminister Lars Løkke Rasmussenimut (V) allakkiamini 31-nik qupperneqartumi, Berlingske Tidende allaaserisaqarpoq.

Allakkiami ilaatigut naqissuserneqarpoq tunngaviusumik inatsisissatut siunnersuut "tunngaviusumik inatsimmut assortuuttutut ittunik aalajangersakkanik ilaqarpoq".

Statsministeriaqarfik tunngavigalugu tunngaviusumik inatsisissatut siunnersuut Skagenimi naalagaaffeqatigiit ataatsimiinnissaanni oqaluuserisassat ilagissavaat, tassani Løkke Rasmussen ulluni taakkunani qaaqqusisuussaaq peqataassallutik savalimmiormiut lagmandiat, Kaj Leo Johannesen aamma kalaallit naalakkersuisuisa siulittaasuat, Kuupik Kleist.

Sapaatit akunneranni tullermi statsministeri pisoq pillugu apeqqarissaarfigineqarnissaminut aggersarnerpoq. Tassani nunanut allanut tunngatillugu oqaaseqartartup Søren Espersenip piumasaqaatiginiarpaa, statsiministerip Savalimmiut qinnuigissagai tunngaviusumik inatsisissamut suliat tamaasa unitsissagaat.

- Statsministeri imminut takutittariaqarpoq. Savalimmiormiutut oqalussinnaavoq taamaattumik taakku namminneq oqaasii atorlugit taamaaliorsinnaavoq, Søren Espersen Berlingske Tidendemut oqarpoq.

Savalimmiut Lagtingiani ilaasortat politikikkut atituumik katiterneqarsimasut marsimi tunngaviusumik inatsisissatut siunnersuut isumaqatigiissutigaat, tassani paragraffi siullermi naqissuserneqaropoq "pisaaneq tamaat Savalimmiormiut pigaat". Tunngaviusumik Inatsit (Grundloven), kunngikkormiut imaluunniit Højesteret tunngaviusumik inatsisissatut siunnersuummi ataatsimiilluunniit eqqaaneqanngillat.

Powered by Labrador CMS