Innaallagissap akissaa ernummatigaat
Ilulissani innuttaasut arlaqartut ernummatigaat Ilulissat eqqaani akisuumik innaallagissiorfiliornikkut innaallagissap akoata qaffannissaat. Nukissiorfiit eqqissisaaput.
Ilulissat eqqaani erngup nukinganik nukiliorfik 2013-mi naammassiguni nunatsinni annerpaat tullerissavaat, akisunerpaarlu. Aningaasat nunatta karsiani attartorneqarallarput, sanaartornerlu 650 million kronit missaani akeqassaaq.
Taamaatoqarneratigut Ilulissani innuttaasut 30-t missaat juunip 10-nni unnukkut innuttaasunik ataatsimiisitsinermi apeqqutigaat aningaasat attartukkat utertinniarneranni innaallagissap akia qaffassannginnersoq.
Lars Hoffmeyer, Nukissiorfiit sanaartornermut pisortaq akivoq, qaffaanissaq siunertaanngitsoq. Erngup nukinganik nukiliorneq akisuujuvoq, ingerlanneqarneralli akikippoq, piffissarlu sivisooq eqqarsaatigalugu sanaartorneqarneratigut sipaarnissaq anguniarneqarluni.
Nunatsinni erngup nukiliorfinnut pioreersunut misilittakkat tunngavigalugit isumaqarpoq Iluliarmiut eqqarsaatigisinnaagaat ukiuni tallimaniit qulinut siullernut akit allanngortinneqarnissaat ilimagisariaqanngitsoq, kingornali appariartulerluni.
- Naatsorsuutigaara innaallagissap akia appariartorumaartoq. Aallaqqaammuunngitsoq siunissamili. Qaffariarnissaa naaatsorsuutiginngilara, ataatsimiinnermi oqarpoq.
- Ingerlatsinermut aningaasartuutit annikilliartussapput. Nukiliorfik naammassippat assersuutigalugu diesili atorlugu nukiliorfimmi atorfissaqartikkunnaassavarput, sillimmataaginnassaarmi. Taannaaq eqqarsaatigalugu ukiumut 25 million kroninik sipaartoqartassaaq, oqarpoq.
UUliallu akiata qaffariartornissaa naatsorsuutigineqarmat maannakkut naatsorsuutigineqartut tunngavigalugit nukiliorfik ukiut 14-it qaangiuppata imminut akilersimassaaq. Nukiliorfik minnerpaamik ukiuni 30-ni atasinnaavoq, ataatsimiinnermi oqaluttuarpoq.
Uuliamik isumalluuteqarunnaarneq
Erseqqissarpaa nunatsinni nerngup nukiliorfiliornermi siunertaasoq uuliamik isumalluuteqarunnaarnissaq, taamaalilluni nunarsuarmi uuliamik akimigut nikeraqisumik isumalluuteqarunnaassalluta. Allatut oqaatigalugu innaallagissap akia naatsorsuutigiuminarnerulissaaq.
Eqqaasitsissutigaa nunatsinni innaallagissap akia naalakkersuinikkut suli aalajangerneqartartoq.
Ilulissanili siunissami innaallagissap akianut suli nalornissuteqartoqarpoq. Tassalu sanaartorneqarnerata akia eqqarsaatigalugu: Sanaartornera akisunerulersinnaavoq qeriuaannartumi sanaartorneq ajornarnerullunilu akisunerusinnaammat. Sulili ullumikkut qeriuaannartumi taamaattumik sananermik misilittagaqartoqanngilaq, ataatsimiinnermi oqaatigineqarpoq.