IA: Annersaaneq nungusagaasariaqarpoq
Inatsisartut ilaqutariinnermut ataatsimiititaliaanni siulittaasoq Debora Kleist kajumissaarivoq 8. martsgruppep peqqarniisaartarnermut akerliunermik takutitseqqusilluni kajumissaarinera sinerissami tapersersorneqaqqullugu.
–Nunatsinni tamarmi peqqarniisaartarnerpassuit tamatsinnik toqqissisimajunnaarsitsisartut ukiuni kingullerni tusartarpagut. Pingaartumik inunnut ilaqutariinnullu eqqugaasunut taamaattunik misigisaqartarneq akuersaarneqarsinnaanngilluinnarpoq, ilaqutariinnermut ataatsimiititalipa siulittaasua Debora Kleist, Inuit Ataqatigiinneersoq, oqarpoq.
– Apeqqutigerusunnarpoq meeqqat inuusuttullu qanoq amerlatigisut pisariaqanngitsumik peqqarniitsuliorfigineqarlutik qaangeruminaatsitaminnik artussaatissinneqartarnersut, Debora Kleist aperivoq.
– Taamatut pisoqartarnera ammasumik oqaluuserisinnaasariaqarparput, ilaatigut inuit pisuussuteqanngitsut eqqugaasarmata tamannalu aamma ilaatigut timikkut pisinnaassutsinik inuunermilluunniit annaasaqarnermik kinguneqartarmat. Taamatut pisoqartarnera akerliunermik ersersitsinikkut nungusartariaqalerparput.
– Nammaqatigiinnermik misiginneqataanermillu takutitsisarneq pingaartorujussuuvoq. Paaseqatigiinnerusariaqarlutalu tamanna qanoq angusinnaanerlutigu oqaluuserisariaqartarput. Neriuutigissavarput ammasumik oqaloqatigiittarnitsigut kingulissatsinnut paasitissallutigu annersaasarneq akuersaarneqarsinnaanngitsoq. Peqqarniisaartarnerup ulluinnarsiutinngunnginngissaa anguniartariaqarparput, Debora Kleist oqarpoq.
– Inuit allat inersimasut qanoq iliorneri uagut susassarinnginnerarlugit imminiiginnaanaveersaartariaqarpugut. Tamatta akisussaaffeqaratta, Debora Kleist.
– Inuit Ataqatigiit iluanngitsumik ineriartornissaq pinaveersaartinniarlugu paaseqatigiinnerunissaq suleqatigiinnerunissarlu sulissutigerusuppaat. Taamaattumillu kikkut tamaasa pisariaqanngitsumik annersaasarnerup ulluinnarsiutinngunnginnissaanut suleqataaqqullugit kajumissaaginnarsinnaavagut. Taamaaliortarneq ammasumik oqaluuseralugu nungusaetariaqarparput, Debora Kleist naggasiivoq.