Danmarkimut ajugaanissaq piumasaqaatigaa

Sydafrikami VM-imeqarnerani tulliani unamminissaminni Camerounip Danmarki ajugaaffigissavaa, taamaaliortariaqarput arsaqatigiit unammisaqattaarnerit aallartinneranniit ingerlaqqissinnaassagunik.

Inissisimaneq taamaappoq arsaqatigiit ataasinngormat Japanimut 0-1-imik ajornareernerisa kingorna, taamaattumik nuna sinnerlugu unammisartut sungiusaasuata Paul Le Guenip piumasaqaataa erseqqilluinnarpoq.

- Danmarki ajugaaffigissavarput. Uagut tamanna nalunngilarput. Arsarluarniarluta misilissavarput aamma unamminermi tassani sapinngisatsinnik tamaviaassaagut, Paul Le Guen oqarpoq.

Cameroun arsamik piffissami annerusumi tigumminnittuuvoq ingamillu arsarnerup naajartornerani arlaleriarlutik periarfissaqarluarput. Arsallammak Samuel Eto'o ajuutingajalluinnarpoq aamma Stephane Mbiap minutsit quliinnanngortut ajuttarfiit teqeqqua eqqorpaa.

Kisianni arsaq iserusunngilluinnarpoq, taamalu Japani ajugaavoq CSKA Moskvami siukkaq qiterliulluni arsartartoq Keisuke Honda, unamminermi unillatsiarneq sioqqullugu, isertitsisoralugu.

Tamannalumi Le Guenio ernumagilluinnarsimavaa.

- Uanga misigisimavunga siulliullutik isertitsisut tassaassasut ajugaasut. Uagut unamminerup immikkoortuani siullermi pissangalluta arsarpugut nalinginnaasumillu piginnaasagut takutinnagit. Tamanna ilungersunartuusoq oqarpoq.

Honda naggataarutaasumik unammisaqattaarnissat sioqqullugit soorlu taamaattoqarsimasoq siukkatut siuartinneqarsimavoq, ajuunissat japanimiut assut ajornartorsiutigisimasaat isertillaqullugut, unamminermi sioqqullugu tallimariarluni unamminerminni ataasiinnarmik isertitsisimagamik.

Talerpiup tungaaniit arsaq siumut aqineqartoq ajuuttarfiit napasuata ungasinnerup tungaanut silaannakkoortoq, Honda tupaallannartumik assersorneqanngiivilluni nikorfavoq taamaattumillu ajornartorsiutiginngivillugu arsaq sakkortuumik isertippaa.

Tamatuma kingorna arsaqatigiit siuarnertik illersorniarlugu sukataaginnaliivipput. Sungiusarluni unammisimanernut tamatuma siornatigut ingerlanneqartunut sanilliussilluni illersuineq pitsaalluinnarpoq, tamannalu sungiusaasup Takeshi Okadap nuannaarutigaa.

- Illersuisugut pitsaalluinnartumik sulipput kisianni arsaattarfimmi siumut sakkortunerunissarput sulissutigisariaqarparput. Holland unammilerutsigu pitsaanerusariaqarpugut.

- Ajugaanerput siulleq nuanneqaaq kisianni suli angusaqanngilagut. Unamminissanuku tulliuttut pingaaruteqartuusut, sungiusaasoq Takeshi Okada oqapoq, piffissami kingullermi assut isornartorsiorneqartarsimasoq japanimiut arsarnerluttarnerat pissutigalugu.

Danmarkip gruppiani unammisaqattaarnerit tulliuttut arfininngorpat ingerlanneqassapput.