Dannebrog immaqa atorneqarunnaarsinneqassaaq
Inuit pisinnaatitaaffi pillugit eqqartuussivimmi aalajangiineq oqaluttuarisaanermik ilisarnaatinut annertuumik kinguneqarnerlussinnaavoq
Kirkeminister Birthe Rønn Hornbech (V) isumaqarpoq nunani, oqaluttuarisaanermut tunngasut upperisamillu aallaaveqartut ilisarnaatit navianartorsiortinneqarsinnaalluartut, soorlu assersuutigalugu Dannebrogimi sanningasoq Europami Inuit Pisinnaatitaaffii pillugit Eqqartuusivimmi annertuumik tatineqarsinnaasoq.
Sianiilliornerussaaq allamik isummersimagaanni, Kristeligt Dagbladimut naqissusiivoq.
Taamatut oqaaseqaateqarneq europami nunani assigiinngitsuni inatsisinut tunngatillugu professorit 37-t oqaaseqaataannut tunngavoq, taakku oqarmata inuit pisinnaatitaaffii pillugit eqqartuussiviup sanningasoq pillugu eqqartuussinerani aalajangiinertut taaneqartup, ilisarnaatinut upperisamik aallaaveqartunut siunissami malersuinermik kinguneqarluarsinnaasoq, tassani pineqarput ilaatigut Dannebrog aamma erfalasut allat danskit erfalasuattut upperisamik tunngaveqartumik ilisarnaatitaqartut.
Taamaalilluni Birthe Røn Hornbechip sanningasoq pillugu eqqartuussinerup kingunerlussinnaaneranut annertunerusumik ernummateqarpoq naalakkersuisooqatiminut, udenrigsminister Lene Espersenimut (K) sanilliulluni, taanna sapaatit akunneranni kingullermi oqarpoq, ilisarnaatinut allanut upperisamik tunngaveqartunut sunniuteqarnissaa ernumagissallugu "uppernanngilluinnartoq".
- Inuit pisinnaatitaaffi pillugit eqqartuussivik politikkimut saqivoq kiisalu kristumiussutsimut aamma upperisaqarnermut akerliulluni isummerpoq. Kikkut tamarmik qanoq upperisaqarnissamik namminneq toqqaasinnaanerminnut kiffaanngissuseqarnerat naqisimalerpaa, tamatumalu kingunerisinnaavaa kiffaanngissuseqarnernut sunut tamanut sunniuteqarnerlussinnaanera, kirkeministeri (ilageeqarnermut naalakkkersuisoq) Kristeligt Dagbladimut oqarpoq nangillunilu, tamanna pissutigalugu eqqartsuusivik "imminut atorunnaarsikkiartulersoq".
Institut for Menneskerettighederni (Inuit pisinnaatitaaffi pillugit Instituttimut) siulittaasoq nutaaq biskob Kjeld Holm, aammattaaq Dannebrogimik sanningasortaqarnera pissutigalugu inerteqqutaatitsilersumik eqqartsuussisoqassagaluarpat soqutiginninnginnissaminut piareersimavoq.
- Kisianni uanga neriuppunga upperalugulu Inuit pisinnaatitaaffi pillugit Eqqartuusivik, atuarfimmi klassit inaanni sanningasumik assiliaqarnerminngaanniit, taanna siunertaqartumik sunniiniarnertut isigineqarsinnaammat, kiisalu oqaluttuarisaanermut tunngaveqartumik ilisarnaataasumut immikkoortitsisinnaassasut, oqarpoq.