Attaveqaqatigiit kalaallit anaanat ikiorpaat
Sønderborgimi arnat attaveqaqatigiit Zonta maanna aningaasanik katersuiniarput aasaanerani højskolertitsiniarlutik Nunatsinni anaananut inuusuttunut.
Zonta, Danmarkimi arnat imminnut attaveqaqatigiittarfiat, aningaasanik maanna katersuiniarluni suliniuteqarpoq Nunatsinni anaananut inuusuttunut aasaanerani højskolertitsiniarluni.
Taamatut alaaserisaqarpoq JydskeVestkysten.
Aasaanerani højskolertitsineq sapaatit akunnerannik ataatsimik sivisussuseqassaaq Tasiilamilu børnehjemiusimasumi ingerlanneqassalluni. Tassani arnat sinittassapput, nerisassapput ilinniartinneqartassallutillu.
Anguniagaavoq arnat inuusuttut inuunerminni atugarisaminnit ileqqoriinnalersimasamit qimatsinissaq, taamaalillutik meeqqatik toqqissisimasumik peroriartorniassammata.
Atuarfiup pisortaa Karen Marie Hougaard naapertorlugu Nunatsinni anaanat inuusuttut peroriartorsimasuupput persuttaasarnermik, imigassartornermik, sumiginnaanermik aamma atornerlunneqarnermik misigisaqarsimasut. Taamatut aasaanerani højskolertitsinermi tamakku misigisat allanngortinniarneqarput.
Aasaanerani højskolertitsineq marlunnik immikkoortoqarpoq ullup qeqqata siornatigut aamma ullup qeqqata kingornatigut ingerlanneqartussat. Ullup qeqqata siornatigut ingerlanneqartassapput ilikkariartornissamik, anaanat inuusuttut angerlartassapput atugarisaminnik ileqqoriinnalersimasaminnit pitsaasumik allanngortitsisimasutut misigisaqarlutik qulakkeerlugulu namminneq qitornatik allaanerusumik toqqissisimanerusumillu meeqqatut atugaqalernissaat, namminneq meeraanerminni misigisimanngisaminnik. Ilinniartassavaat meeqqap ineriartorneranut tunngasut, peqqinnartunik akikitsunillu meeraaqqanut nerisassat, meeraaqqap pissusaa qanoq isumaqarpa, isumassuineq sunaana? Ullup qeqqata kingornatigut isumassarsiorsinnaassusermut aamma pilersitsisinnaassusermut tunngasunik sammisaqartassapput.
Suliniummik tapersersuisoqarusuppat mailertoqarsinnaavoq uunga: karen.marie.hougaard@hoerup-skole.dk
Zonta Sønderborg arnanut attaveqaqatigiittarfiuvoq Haderslevimiit - Sønderborgimi najugalinnut. Ilaasortat tamarmik qaffasissumik atorfeqartuupput imaluunniit namminersortutut inissisimasuullutik.