BP Canadami unitsinneqarpoq
Mexicop kangerliumarngani avatangiisinik mingutsitsinerujussuaq Canadap naalakkersuisuinik mianersortitsilerpoq.
Nunarsuarmi suliffeqarfiit uuliamik tunisassiortut annersaasa pingajuat BP nuanngitsumik tatisineqaqqilerpoq. Apriilip 20-ata siuninnguatigut BP uuliamik qernertorsuamik Mexicop Kangerliumanerani annertoorsuarmik mingutsitsinini aallartinngitsiartoq, uuliasiortut Canadap Issittortaata imartaani uuliasiornermi qillerinissamut malittarisassat qasukkartinniarlugit misiliisaqattaaraluaroiq. Taamaaliorniarnerli iluatsinngitsoorpaat.
BP-imit canadamiut nukissiornermut oqartussaasui uppertinniarneqaraluarput qillerinermi sillimaniarnermut piumasaqaatit nalinginnaasut akisuallaartut, suliariuminaallutillu taamaattumillu sakkukillineqartariaqartut. Sunniiniarnerli iluatsinngitsoorpoq.
Kangerliumanermi avatangiisinik ajutoortitsinerujussuupp Ottawami naalakkersuisunik sillimmatitsispput, suliniullu pillugu tusarniaanerit ingerlaannartumik unitsinneqarput, Berlingske Tidende allaaserisaqarpoq ilaatigut tuluit tusagassiorfii innersuussutigalugu soorlu inuussutissarsiorneq pillugu atuagassaiq Economist.
Uuliamik mingutsitsinerup kingorna Canadap, USAp aamma Norgep qillerinissamut akuersissutinik nutaanik tuniussisarnitik - tassa misissueqqaarneq - imaanit itisuumi ingerlanneqartussat tamatumunnga ilanngullugu issittumi unitsippaat. Shell, BP, Exxon Mobil, Chevron aamma uuliasiornermut ingerlatsisut allat tulleriaaginnarlutik Canadap aamma USAp issittortaani, tassa Alaskami, uuliasiornissamut aamma gasisiornissamut akuersissutinik piniarput.
Kalaallit Nunaat peqataanngilaq. Tamaani killilersuisoqassanngilaq.
Aatsitassanut Naalakkersuisoq Ove Karl Berthelsen Naalakkersuisunut inassuteqarpoq, tuluit ingerlatsiviat Cairn Energy aasaq manna marluugallartunik qillerinissaminut akuersissuteqarpoq. TV-Avisip aallakaatittagaani Horisontimi oqaatigineqarpoq Naalakkersuisut ullumikkut nalunaaruteqarniartut.
Naak Mexicop Kangerliumarngani ajunaarnersuaqaraluartoq Cairn Qimusseriarsuarmi Kalaallit Nunaata oqartussaaffiani Canadamut killeqarfimmut qanittumi uuliasiorniarpoq. Naatsorsuutigineqarpoq Issittup imartaani nappartanik 50 milliardinik peqartoq aammattaaq naturgasimik taassaanngitsumik peqarluni.