Ajunaarnersuaqaraluartoq uuliasiorneq ingerlaannassaaq
Naalagaaffeqatigiinni immikkoortut avannarliunerusut Kalaallit Nunaat aamma Savalimmiut uuliasiornertik ingerlatiinnarpaat naak Mexicop Kangerliumanerani uuliasiornermi ajunaarnersuaqaraluartoq.
Nunat taakku marluk oqartussaasuinit aviisimut ullormut saqqummersartumut Børsenimut nalunaarut erseqqissoq taamaappoq.
Nunani taakkunani marlunni norskit maleruagassaat sukannersut malinneqarput taamaattumik immap naqqani toqqortaagunartumik uuliamik aningaasarsiorluaataasinnaasumik ujarlerneq unitsittariaqanngilaq. "Kalaallit Nunaanni Naalakkersuisut uani sapaatit akunneranni nutaamik qillerisoqarnissaa aalajangiiffigisussaavaat, sumiiffiillu qinnuteqarfigineqarsimasut tamarmik imaammi ikkattumiipput," Kalaallit Nunaanni Aatsitassanut Ikummatissanullu Naalakkersuisoqarfimmi pisortaq Jørn Skov Nielsen oqarpoq.
Børsenimut taamatut oqarpoq.
Isumaqarpoq qillerinissat nutaat unitsinneqarnissaat pisariaqartoq, tassami Kalaallit Nunaata norskit uuliasiorluni qillerinermut malittarisassaat, nunarsuarmi sukannernissat akornanniittut malippai. "Malittarisassat sunut tamanut tunngapput aamma Mexico Kangerliumanerani uuliasiorluni qillerinermi malittarisassanit atuuttunit sukannernerujussuupput." oqarpoq.
Savalimmiut kangimut kujataani 1200 km-inik ungasitsigisumi Savalimmiuni isuma aamma taamaappoq. Tamaani uuliamik nassaarniarneq ingerlanneqaannarpoq, Savalimmiuni uuliasiornermut tunngatillugu allaffeqarfimmi sillimaniarnermut pisortaq Meinhard Eliasen oqarpoq.
"Mexicop Kangerliumanerani pisoq sunniuteqanngilaq kisianni uagut Danmarkimi, Norgemi aamma Tuluit Nunaanni oqartussaasut qanimut attaveqarfigisarpagut," oqarpoq. "Kisianni pisoqanngilaq piumasaqaatinik sukannernerulertitsinissatsinnik tunngaviusinnaasumik. "Savalimmiuni misiliilluni qillerinerit arfineq-aappassaat aallartinneqassaaq, taanna Italiamiut ingerlatsiviannik aqunneqarpoq 1107 meterinillu itissusilimmi ingerlanneqassalluni. Naak taamak ititigisumiikaluartoq, tassa Nordsømi qilleriffissat itinersaasa ilaanni, tamanna ingerlanneqaannassaaq.