Niviarsiaqqat meeraasarnerat sivikinnerulersimavoq
Inuusuttunngiliaarnerusalerput. Niviarsiaqqallu ukiut 15-it siornatigorniit ukiumik ataatsimik siusinnerusukkut ivianginittalerput. Ilisimatuut stoffit hormoninik akorngusersuisartut tamatumunnga peqqutaasoraat.
Danmarkimi niviarsiaqqat ukiut 15-it siornatigorniit ukiumik ataatsimik siusinaarlutik ivianginittalerput. Niviarsiaqqat suli qulinik ukioqaleratilluunniit hormonit malugisalerpaat, 24timer allappoq. Kalaallit niviarsiarartaat qanoq innersut ilisimaneqanngilaq. Taamatupajaarli innissaat ilimagineqarpoq.
Danmarkimi ph.d-ngorniut nutaaq taamatut uisaallannartunik inerneqarpoq, tassanilu Danmarkimi niviarsiaqqat ivianginittarnerat 1991-imiit 2006-imut agguaqatigiissitsinermut sanilliunneqarsimavoq.
1991-imi inuusuttuaranngulernerat 10,88-inik ukioqarneranni malunniuttaraluarpoq, 2006-imili 9,86-inik ukioqaannarlutilli ivianginikkiartulersarput.
– Ineriartorneq taamaattoq malunnartorujussuuvoq. ph.d-ullunilu nakorsaq Lise Aksglæde Rigshospitalimeersoq, misissuisuusimasoq 24timer-imut oqarpoq.
Piffissami tassani aamma aaqartaliaarnerusimapput, agguaqatigiissillugu 13,1-inik ukioqarlutik aaqartalersarlutik.
Inuuniarnermi atukkat pitsaaneruleriartornerat ilutigalugu niviarsiaqqat inuusuttuaranngulersarnerat ukiut hundredit marlussuit kingulliit ingerlanerini siusilligaluttuinnarsimavoq. Niviarsiaqqalli namminneq hormoninik pilersitsisarnerat inooriaatsillu allanngorsimanera kisimik ineriartornermut tassunga nassuiaatissaasinnaanngillat.
–Tupaallaatigisatsinnik aamma BMI-t allanngorsimapput, niviarsiaqqat namminneq hormoniliortarnerattuulli. Taamaattumik stoffit hormoninik akorngusersuisartut peqqutaaqataanissaat ilimatsaanneqarpoq, Lise Aksglæde nassuiaavoq.
Stoffit hormoninik akorngusersuisartut kemikaliat nerisatsinniittut akugajunnerusarpaat, atortulli ullumikkut atortakkatta ilaat aamma tamakkuninnga akoqartarput.
Stoffit hormoninik akorngusersuisartutut isigineqarsinnaasut EUp allattortissimavai. Stoffit allattorneqarsimasut 194-iupput.
Center for Hormonforstyrrende Stoffer-imi Rigshospitalimiittumi stoffit hormoninik akorngusersuisartut niviarsiaqqat inuusuttuaranngujaartarnerannut peqqutaasorineqarnerat uppernarsarneqarpoq.