IQ-rissarneq kisimi naammanngilaq
Maligassiuisussat aamma universitetimi ilinniarsimasuusariaqarput. Tamarmilli taamaanngillat. Ilisimasallit nunanit tamaneersut qanoq iliortoqartariaqarnera Sisimiuni workshop-eqarnermi paasivaat.
Silassorinneq kisiat atorlugu universitetimi ilinniartoqarsinnaanngilaq. Maligassiuilluartussat aamma pitsaasunik ikiorteqartariaqarput. Universitetimili ilinniartut tamarmik anaanamik, ataatamik, akkammik atsammilluunniit kanditatitut ilinniarsimasumik saariarfissaqartanngillat. Silarsuarmi ilinniagaqarfiit tamarmik tamanna ajornartorsiutigisarpaat. Taamaattumik ARTEK-imi (kalaallit ingeniørinngorniat ilinniarfianni, aaq.) ilinniartunik siunnersuisartoq Hans Peter Christensen, silarsuarmi sumiiffinni allani ilinniagaqarnermik paasisimasaqarluartunik seminareqartitsisimavoq.
Paasisimasaqarluartut arfineq pingasut ilaatigut Frankrigimeersut, Brasiliameersut, Spaniameersut, Chilemeersut, Columbiameersut Kalaallit Nunaanneersullu sapaatip akunnera naammatsillugu 'Arctic Engineering Student Challenge'-imik taaneqartumik workshopeqarsimapput. Tassani ilinniagaqartunik, tunulequtaat misilittagaallu nalulluinnakkanik, ilinniartitsissagaanni suut pisariaqartarnerat pillugu paasisaminnik paarlaateqatigiillutillu ilinniartitsisarneq pillugu eqqarsaqqissaarsimapput.
– Kalaallit Nunaanni ilinniartut kisimik ilinniakkaminnik paasiuminaatsitsisanngillat. Assigiinngitsopassuarnik allanik misilittagaqartarput, ilinniarnerli pinnagu. Ilinniartunik atuagarsornerunngitsunik allarpassuarnilli misilittagalinnik ilinniartitsinissaq imaannaanngilluinnartuusarpoq, Hans Peter Christensen oqarpoq.
Workshopertut marlunngormat Itillimiipput, tassanilu atuarfimmi atuartut, ilinniartitsisut atuarfiullu pisortaa Jimmy Hymøller, nunaqarfimmiuaqqanik atualerlaanik atuartitsisarnermik misilittagaqarluartoq ilisimasanik paarlaasseqatigaat.
Ilinniartut ilarpassui ajormartorsiortaraluarpataluunniit taamaattoq kalaallinik arlalinnik ingeniørinngortoqarsimavoq. Katillugit 24-it issittuni ingeniøritut ilinniarlutik naammassisimapput, taakkunanngalu 13-it Kalaallit Nunaanni atorfeqarput. Pingasut civilingeniørinngorniarlutik ingerlaqqipput, sisamallu Artekip angelarsimaffiani Sisimiuni atorfeqarput. Massakkorpiaq isittuni ingeniørinngorniarlutik ilinniartut 50-iupput, taakku ukiup aappaa avillugu Sisimiuni Artekimiittarput, kingorna ukiut pingajuat avillugu Danmarkimi DTU-miittarput (Danmarks Tekniske Universitet).
– Nunanit tamaneersut workshopeqarnerat, assigiinngitsunik ilinniagallit ilaatigut spykologit ingeniørillu assigiinngitsunik oqaasillit peqataaffigisaat suliassat assigiinngitsut pillugit inassuteqaatinik arlallinik inerneqartussaavoq, Hans Peter Christensen oqarpoq.