Katereeramik Manerassuarmi angalasut

Sverigemi kunngissaq, kateqqammersoq Victoria, maanna uitaanilu prins Danielilu Fransk Polynesieamiipput, Sverigemi aviisit ilaat allaaserisaqarpoq.

Sverigemi aviisit nunaminni arnap kunngissap Victoriap uitaavatalu Danielip sumut angalanerat paasiniarsuataarpaat paasisimasoraallu Fransk Polynesiamut angalasimasut. Assiliisoq: Polfoto/Robert Eklund.

Eqqarsaatersuuteqarfigineqarsimaqaaq Sverigemi kunngissap Victoriap aamma prins Danielip arfininngormat Stockholmimi alutornartumik katereerlutik sumut angalassanersut.

Maannali Sverigemi aviisit ilaata Expressenip ilisimanerarpaa aappariilerlaat Fransk Polynesiamut angalanerat, tassa Manerassuarmi qeqertat Tahiti aamma allat qeqertat 117-it.

Aviisi taanna naapertorlugu Victoria aamma Daniel nammineq pigineqartumut timmisartorlutik nunarsuatta illuatungaanut angalapput, tassani umiarsuaaraq pisoorsuarnit pigineqartoq apuukkunik ikiffigissallugu.

- Nunnikkamik umiarsuaaqqamit utaqqineqarput, Expressenimut isiginnittoq oqaluttuarpoq, aviisimi aamma takutinneqarput timmisartoq Tahitimut mittoq.

- Angallat ippassaammat apuuppoq utaqqiartorlugit. Nassataat niuneqarmata angallammukaassorneqarput, ingerlaqqippullu, takunnissimasoq aviisimut oqarnerarneqarpoq.

Aamma Sverigemi kunngi Carl Gustav aamma dronning Silvia ukiut 34-t matuma siornatigut katereerlutik katinnerminnut atatillugu Nunarsuatta illua tungaanut angalapput - tassa Hawaiimut.

Powered by Labrador CMS