Naluttarfik aamma uumasuusivik
Qeqqata Kommuniani katersugaasiviit kommunimi meeqqat inuusuttuaqqallu qaaqquaat Maniitsoq aamma Sisimiut pillugit qalipaaqqullugit titartaaqqullugillu, illoqarfinni taakkunani ukioq 2030-mi qanoq isikkoqarumaarnersut takorluukkaminnik.
Meeqqat inuusuttuaqqallu illoqarfimminni kissaatigisatik takutippaat Qeqqata Kommuniani katersugaasiviit inuiattut ullorsiornermut atatillugu kommunimi meeqqanik inuusuttuaqqanillu aggersaammata ukioq 2030-mi illoqarfitsik qanoq isikkoqarumaarnerat pillugu takorluukkaminnik qalipaaqqullugit titartaaqqullugillu.
Ulloq naallugu meeqqat inuusuttuaqqallu katersugaasivinnut alakkaartuarput illoqarfinni taakkunani tamani immikkut annoraaminineq fem meterinik angissuseqartoq titartaaffigalugulu qalipaaffigalugu.
Maniitsumi ilaatigut takuneqarsinnaavoq naluttarfeqalernissaa kissaatigineqarluartoq siunissami illoqarfimminni soqarnissaanik kissaatigineqarnerpaajummat. Aamma uumasuusiveqarnissaa ataasinnguup kissaatigisimavaa, soorlu aamma tivoli arlaata titartarsimagaa.
Sisimiuni meeqqat takorluugaraat kuultisiorfeqalernissaa, ima annertutigisumik allaat aqquserngit kuultilersukkat titartarneqarsimagamik.
Inuiattut ullorsiorneq qaangiutereerpat siunissamut kissaatigineqartut eqqarsaatersuutaat illoqarfinni taakkunani nivinngarneqassapput.
Ukiuni 20-ni titartaaffigisaat katersugaasivinniitineqassapput ukiorlu 2030-mi inuiattut ullorsiornermi nivinngarneqassallutik, Qeqqata Kommuniani katersugaasiviit ilisimatitsipput.