Oqaatsinik naliliineq maluginiarneqarpoq
Dansk Folkepartip qularaa Siumup Inatsisartut oqaluttarfiani qallunaatut oqalunneq unitsissinnaagaa.
Oqaatsit pillugit politikki maluginiarneqarpoq.
Dansk Folkepartip qularaa Siumup Inatsisartut oqaluttarfiani qallunaatut oqalunneq unitsissinnaagaa.
Oqaatsinik naliliineq ilisimatuup inuiannullu inatsisinik immikkut ilisimasallip Ole Spermannip suliaa Siumumiit Folketingimut ilaasortamit Lars-Emil Johansenimit suliakkiutigineqartup kingunerisinnaasai Dansk Folkepartip qularai. Spiermann allaaserisamini naqissusiigaluarpoq, nunat tamat akornanni naalagaaffiit inatsisaat imaluunniit namminersorlutik oqartussat inatsisaa akornutaanavianngitsut Inatsisartut oqaluttarfianiit qallunaatut oqalunnissaq inerteqqutigineqalermat soorlu Siumut taama suliniuteqartoq.
Dansk Folkepartimiilli Søren Espersen Siumut isummerneranut isumaqataanngilaq, soorlu aamma qularalugu Kalaallit Nunaata titarsinerinnakkut qallunaat oqaasiisa politikkikkut atorneqarnerat atorunnaarsissinnaagaa.
-Naalagaaffeqatigiiutilluta inuiaqatigiinni kalaallini qallunaat oqaasii akuupput. Tassani Siumut kisimiittutut inissisimavoq. Kalaaleq Folketingimut qinigaasinnaavoq qallunaatut oqalussinnaanngikkaluarluni, oqaluttattarfimmiillu kalaallisut oqalunnissaa ajunngilaq. Taava inimi issiasut sinnerisa siutequtit tiguinnassavaat nutserunneqarlutillu, Søren Espersen Berlingske Tidendemut oqarpoq.
Qallunaat oqaasii inerteqqutaalerpata tamanna ima kinguneqassaaq Naalakkersuisuni ilaasortat marluk, Inatsisartunilu ilaasortaq ataaseq sinniisussarlu naalakkersuinikkut oqalliseqataanissaminnut periarfissaarutissallutik.