Issittuni avatangiisit ulorianartorsiortinneqassanngillat
Naalakkersuisut uuliasioqatigiiffillu Cairn isumaqarpoq naammattumik isumannaallisaasoqarsimasoq.
Skotlandimiut pigisaat Cairn Energy Naalakkersuisullu - tupinnanngitsumik uppernarsaapput - BP-ip ajutoornersuatut, qaammatit marluk ingerlanerini Den Mexicanske Golfimik mingutsiterujussuartutut pisoqannginnissaa naammattumik isumannaallisaavigineqarsimasoq. Imaappoq Nordsøenimi uuliasiornermi malittarisassat malinneqassasut.
– Taakku silarsuarmi malittarisassat sukanganersaraat, kalaallit aatsitassarsiuornermut pisortaqarfianni direktøriusoq Jørn Skov Nielsen Berlingske Tidendemut oqarsimavoq.
Taamaalilluyik Naalakkersuisut uuliasioqatigiiffiullu Edinburghimeersup nunani tamani avatangiisit pillugit ilisimasaqarluartoq professor Peter Wathams Cambridgep universitetianeersoq, Verdensnaturfonden Inuit Circumpolar Conferencellu (ICC) Kalaallit Nunaanni siulittaasua Aqqaluk Lynge nipangersinniarpaat. Taakku Kalaallit Nunaata Baffin Bugtimut atasortaani uuliamik ujaasilluni qillerinissaq issittuni avatangiisinik immeraassutaanerarsimavaat,
Kalaallit Nunaata ippassigami Cairn maloriarluni qillerinissamut akueraa. Tamanna qaammatini arlalinni isumaqatigiittoqareersorlu pivoq, Cairnilu isumaqatigiinniarnerup nalaani isumannaallisaanermut, peqqinnermut, avatangiisinut upalungaarsimanermullu iliuusissanik, nunani tamani iluuusaasartunut qaffasinnerpaanut naapertuuttunik aaqqissuussisimavoq.
Cairn siornatigut issittumi qillerisimanngisaannarpoq taamaallaallu ilaatigut Indiami qillerisimalluni, massakkullu norgemiut Nordsømi malittarisassaat pillugit qilerisussanngorpoq.