Akileraartaratik sullissisartunut innersuussisimasut suneqanngillat
Sulisumik akileraartaratik ulluunerani paarsisartunut innersuussisarsimanerat Kommuneqarfik Sermersuup ajuusaarutigaa.
Annonse
Ajuusaarneq, kinguneqartitsinertaqanngitsoq.
Kommunimi sulisut akileraartaratik ulluunerani meeqqanik paarsisartunut innuttaasunik innersuussisarsimanerat pillugu Kommuneqarfik Sermersooq taamatut naliliivoq, KNR ilisimatitsivoq.
Kommuneqarfik Sermersuup allaffissornerani qullersaagallartoq Stine Johansen taamatut erseqqissaavoq. Malittarisassanik unioqqutitsisoqarsimanera nalunngikkaluarlugu.
Sulisut taakku atassuteqarfigineqarput pisimasullu imaannaanngitsuuneranik ilisimatinneqarlutik. Kommunimi sulisut ulluunerani paarsisartunut pisortanit akuerineqarsimanngitsunut innersuussisarsimanera ajuusaarutigaara. Tamanna akuerineqarsinnaanngilaq, Stine Johansen KNR-imut erseqqissaavoq.