Imaaliarsaarneq misiliut atorlugu paasineqarsinnaavoq
Siunissami arnat paasisinnaalissavaat, qaqugukkut kinguaassiorsinnaajunnaarnerlutik.
Ilisimatuut periutsimik piorsaasimapput ataasiarluni aaversinnikkut qaqugukkut imaaliarsaalernissaq paasineqarsinnaalluni. Tassani paasineqarsinnaavoq arnat ukiut qassit kinguaassiorsinnaanersut.
Arnat ataasiarlutik aaversinnermikkut paasisinnaalissavaat, inuunerminni qaqugukkut imaaliarsaalissanerlutik meerartaarsinnaajunnaarlutillu. Taama allapppoq Berlingske Tidende.
Misissuinermi arnat 226-t misissorneqarput, ilisimatuut siulittorsinnaalerlugu arnat qaqugukkut kinguaassiorsinnaajunnaarumaarnersut imaaliarsaalerlutillu.
Ataasinngormat Romami Europamiut kinguaassiorsinnaanermut suleqatigiiffiaata ukiumoortumik ataatsimeersuarnerani misissuineq saqqummiunnearpoq. .
Rigshospitalimiit ilisimatooq Claus Yding Andersen naapertorlugu tamanna arnanut siusissukkut imaaliarsaalersunut annertuumik sunniuteqarsinnaassaaq - tassalu 30-ikkut naanerani 40-kut aallartilaarnerani.
Ilisimatuut arnat aavernerisigut hormoni AMH qanoq annertutiginersoq paasisarpaat. Hormoni mannissaqarfinni pinngortarput.
Arnat aavanni AMH annikippat tamanna mannissat ikinnerannut takussutissaavoq. Mannissaaruttoqarsimappat tamanna tassaavoq imaaliarsaalerneq aallartissimasoq, Claus Ytting Andersen oqarpoq.