Siku sukkasuumik aakkiartorpoq

Ukioq manna immap sikua sukkaqisumik aakkiartorpoq, silap pissusaanik ilisimatuut ilimasaaripput.

Ilimagisamiit annertunerusumik imaq qaffanerussaaq. Assi: Ullstein Bild

Ukioq manna kingumut ilisimatuut issittup imaata sikua sukkaqisumik aakkiartornerarpaat. Sikup annertussisiata qaammataasamik uuttortarnerani paasineqapoq maajip qaammataani aatsaat taama sukkatigisumik annikilliartortoq.

Taama kingullermik nalunaarusiamini nalunaarusiorput USA-mi apummik sikumillu misissuiffik National Snow and Ice Data Center ( NSIDC). Taassuma saniatigut Polar Science Center University of Washingtonimiittoq nalunaarpoq, sikup annertussusaa maajimi 2010-mi 19.000 kubikkilometeriusoq, aatsaallu 1979-miit 2010-mut maajip qaammataani annikitsigaluni.

Taamaalilluni immap sikua maajimi ukiuni 30-ini maajimi agguaqatigiissillugu annertussusia 32 procentimik annikinneruvoq.

Sikup annertussusaa ilisimatuunit nakkutigeqqissaarneqarpoq.

- Nunarsuup affaani avannarlermi immap sikuanik ukiunik arlalinnik pisoqaassuseqartumik peerukkiartorpoq.

Sukkasuupilussuarmik immap sikua ukiunik arlalinnik pisoqaassusilik nungukkiartorpoq, sila pissussaanik ilisimatooq Canadamiu David Barber University of Manitobameersoq oqarpoq.

NSIDC naapertorlugu maajimi immap sikuata annertussusaaullormut 68.000 kvadratkilometerimik annikillisarpoq upernaakkut kiannerulernerata kingunerisaanik, ukioq manna kiannerusimammat. Upernaat aasallu tamaasa siku aattarpoq, maannakkulli ullormut 68.000 kvadratkilometerit aattarmata tamanna 1979.miit 2000-mut maajip qaammataanut naleqqiullugu agguaqatigiissillugu 50 procentimik qaffasinneruvoq, NSIDC nalunaarpoq.

David Barberip suleqataa qallunaaq sermersuarmi qillerisartoq Niels Bohr Institutetimiittoq ilisimatooq Dorthe Dahl-Jensen suleqatini assigalugit aamma ernumavoq.

- Ersissutigaara pissutsit ajorsiartupiloornissaat, maannakkullu killiffipput imaalersimavoq nunarsuarmioqatigiinnit sunnerneqarsinnaajunnaalerluni, Dorthe Dahl-Jensen Ugebrevet Mandag Morgenimi oqaloqatigineqarnermini oqarpoq.

Sikup aannera namminermi nunarsuarmi immap qaffanneranik kiguneqarnavianngilaq, sikumi taanna immap qaaneereerpoq. Immalli sikuata aakkiartornera ilutigalugu Kalaallit Nunaata sermersua aamma aakkiartussaaq.

- Siku qanoq sukkatigisumik aassanersoq naluarput, taannalu immap sarfaanut qanoq sunniuteqassanersoq. Tassalu ulorianartua. Maannamut nunarsuarmi silaannap kissakkiartornerata siulittorneqartarneratigut ilimanarpoq siusinnerusumi oqaatigineqartartumiit annertunerusumik imaq qaffassasoq, Dorthe Dahl-Jensen oqarpoq.

Powered by Labrador CMS