Ilumoortut eqqoriaanerunngitsut
Kuannersuarni Narsap eqqaaniittumi aatsitassarsiornissaq pillugu HS Analysep innuttaasunik isumasiusimanera isumasiuisarnermi malittarisassat silarsuarmi akuerisaasut tunngavigalugit ingerlanneqarsimavoq, siulersuisut siulittaasuat oqarpoq.
Kuannersuarni Narsap eqqaaniittumi aatsitassarsiornissaq pillygu HS Analysep innuttaasunik isumasiuisimanera Aqqaluaq Egedep tusagassiuutitigut nalunaaruteqarluni uppernannginnerarlugulu isumasiuinerup qanoq inerneqarnissaa aalajangeriigaasimanerarpaa.
– Ilumoorpoq Greenlans Minerals and Energi A/S misissuisitsisuusimammat, inernissaali suliffeqarfiup sunniuteqarfigisinnaanngilaa. Oqaatigisinnaavarput misissuineq eqqortumik malittarisassallu silarsuarmi isumasiuisarnermi atugassatut akuerisaasut tunngavigalugit ingerlanneqarsimammat, Greenland Minerals and Energy A/S-ip siulersuisuisa siulittaasuat Lars Emil Johansen oqarpoq.
Misissuinikkut Kuannersuarni aatsitassarsiornissap tapersersorneqarnerata paasinarsinera Lars Emil Johansenip nuannaarutigaa. Pilersaarutilli aamma Kujataani suliffissaqarniarnermut iluaqutaasussaanerata paasilluarneqarnerata akuersaarnermut peqqutaaqataanera aamma nalunnginnerarpaa.
– Tassuuna Aqqaluaq Egede isumaqatigaarput, nalunngilarpullu aamma inuit, avatangiisit pinngortitarlu pitsaanerpaanik isumannaallisaavigineqarsinnaanngippata aatsitassarsiornissaq tapersersorneerukkumaartoq, Lars Emil Johansen oqarpoq. Tusagassiorfitsigullu nalunaarummini allappoq, nammineq isumasiusinermi peqataasimasut, suliffisssaqarniarnermik isumakuluutiginnittut Aqqaluaq Egedetuulli asissorumanngikkini.
– Innuttaasut suliffissaqarniarnermik isumakuluutiginnittut assuarisariaqanngillat. Taarsiulluguli suliffissanik pilersitsiniartariaqarpoq, aatsitassarsiornerullu kingunerisassat suut tamaasa ilisimaqqissaanngikkaluaraanniluunniit, kikkulluunniit taanna pillugu isummersorsinnaasariaqarput. Isumasiuneq raketsit pillugit ilisimatusarnerunngilaq, innuttaasulli piffissami aalajangersimasumi apeqqutigineqartumut isummerneraat - isumasiunerillu nalunngisatsitut ilaanni kukkorujussuarsinnaasarput, Lars Emil Johansen oqarpoq.
Aqqaluaq Egede, Kuannersuarni aatsitassarsiornissaq, oqaaseqarfigisani pillugu paasiniaaqqissaarsimanngitsutut isigisani naqqikkusuppaa.
Aatsitassarsiorsinnaanermut misissueqqissaarnerit ukiuni marlussunni ingerlanneqarsimapput, massakkullu killiffik unaavoq, Greenland Minerals and Energy misissuinerit akisuut ingerlateqqinnissaannut politikikkut innuttaasuniillu tapersersortissarsiorpoq. Taamatut tapersersorneqarsinnaagutta misissueqqaarnerit ukiut marluk-pingasut qaangiuppata naammassisinnaassavagut, taavalu politikerit innuttaasullu isummerfigisinnaalissavaat Kuannersuarni piiaasoqarsinnaanera naammattumik qaammarsaatigineqarsimanersoq, Lars Emil Johansen oqarpoq.
Greenland Minerals and Energy A/S neriuppoq, Kuannersuarni misissuinerit ukiualuit qaangiuppata naammassippata politikerit aalajangersinnaajumaaraat aatsitassarsiornissaq isumannaalluinnartumik ingerlanneqarsinnaasoq aammalu nunat tamat akornanni piumasaqaatit ilisimatuutullu paasisat naleqquttut tunngavigalugit akuerissutigiumaaraat. Misisueqqinnertigut isumannaatsumik ingerlatsisoqarnissaa qularnaarneqarsinnaanngippat pilersaarut unitsinneqassaaq, Lars Emil Johansen oqarpoq.